Almaty sottary Qaırat Satybaldydan qaıtarylǵan qonaqúıge jaıǵasýy múmkin
ALMATY. KAZINFORM – Almatydaǵy Esentaı ózeniniń jaǵasynda ornalasqan, kezinde Qaırat Satybaldynyń menshiginde bolǵan, keıin memleket qaraýyna ótken elıtalyq qonaqúı ǵımaratyna aldaǵy ýaqytta qalalyq sottar kóshýi múmkin.
Almaty boıynsha memlekettik múlik jáne jekeshelendirý departamenti agenttik saýalyna bergen resmı jaýabynda bul nysannyń respýblıkalyq menshikke zańdy negizde ótkenin málimdedi.
Vedomstvonyń túsindirýinshe, QR «Memlekettik múlik týraly» Zańynyń 19-baby 1-tarmaǵynyń 9) tarmaqshasyna sáıkes, memleket múlikke quqyqty óteýsiz berý (syıǵa tartý) arqyly da ıelene alady.
– Memleketke syıǵa tartý sharty boıynsha múlikti qabyldaý qaǵıdalaryna jáne QR Qarjy mınıstrligi Memlekettik múlik jáne jekeshelendirý komıtetiniń 2023 jylǵy 13 maýsymdaǵy buıryǵyna sáıkes, 2023 jylǵy 1 tamyzda QR azamaty Qaırat Satybaldyuly men departament arasynda jalpy aýdany 9 461,6 sharshy metr bolatyn jyljymaıtyn múlik nysanyn memleket menshigine berý týraly syıǵa tartý sharty jasaldy, - dedi departament basshysynyń orynbasary Aınabekov.
Kadastrlyq nómiri 20:313:003:057:1/A nysan Almaty qalasy Bostandyq aýdany, Kóktem-3 yqshamaýdany, 22-úı mekenjaıynda ornalasqan. Ǵımarat 0,2222 gektar jer teliminde tur.
Departament málimetinshe, 2023 jylǵy 1 qyrkúıektegi buıryq negizinde ǵımarat respýblıkalyq menshik nysany retinde «Qazaqstan Respýblıkasy Sot ákimshiliginiń Almaty boıynsha departamenti» RMM-niń balansyna bekitilgen.
Almaty qalalyq soty bul aqparatty rastap, nysanǵa qatysty qandaı da bir aýyrtpalyqtardyń joq ekenin habarlady.
Sot ókilderiniń aıtýynsha, ǵımarattyń aldaǵy paıdalanylý máselesi barlyq tıisti rásim aıaqtalyp, onyń tehnıkalyq jaı-kúıine tolyq baǵalaý júrgizilgennen keıin sheshiledi.
– Zertteý qorytyndysy boıynsha nysandy paıdalaný tártibi, sondaı-aq jóndeý jumystaryn júrgizý qajettiligi aıqyndalady. Qandaı sottardyń kóshiriletini jáne kóshý merzimi daıyndyq sharalary aıaqtalyp, tıisti uıymdastyrý boıynsha sheshimder qabyldanǵannan keıin belgili bolady, - delingen Almaty sotynyń resmı jaýabynda.
Jýyrda áleýmettik jelilerde qonaqúıdiń qazirgi jaı-kúıi túsirilgen vıdeo tarady.
@katya.mobvideo Interesno, kakova býdet dalneıshaıa sýdba zdanııa? Iz razrıada- tak ne dostavaısıa je ty nıkomý! Ilı, vse-takı otdadýt pod sýdy, ılı pod kakoe-to obşestvennoe delo? Chto dýmaete?
♬ Clausen: In pace - The Choir of Royal Holloway & Rupert Gough & René Clausen
Jazba avtorynyń aıtýyna qaraǵanda, vandaldar ǵımarattyń kireberis bóligin búldirgen: esikter men qorshaýlar zaqymdalyp, qasbettiń granıt elementterine nuqsan kelgen. Ǵımarattyń ishki jáne syrtqy aýmaǵy qoqysqa tolyp qalǵan.
Agenttiktiń fototilshisi de oqıǵa ornyna baryp, nysannyń qazirgi ahýalyn kózben kórip keldi. Qonaqúıdiń ishine kirý múmkin bolmaǵan, birinshi qabattaǵy barlyq esik pen tereze alynǵan. Kýágerlerdiń aıtýynsha, nysan aýmaǵyna polıtsııa qyzmetkerleri jıi kelip turady eken.
Kózben sholǵanda, kireberis bóliginde zaqym izderi anyq baıqalady: qorshaý elementteri men baspaldaq tutqalary synǵan. Ǵımarat qasbetinde jazýlar paıda bolyp, keıbir qaptama plıtalar búlingen.
Aıta keteıik, 2024 jyly Sybaılas jemqorlyqqa qarsy qyzmet Qaırat Satybaldyǵa tıesili bolyp, memleketke qaıtarylǵan birqatar aktıvter týraly aqparat jarııalaǵan edi.
Qaıtarylǵan aktıvterge ákimshilik ǵımarattar, sonyń ishinde Kaisar Plaza bıznes ortalyǵy, eksklıýzıv zergerlik buıymdar, lıýks úıler, páterler men avtomobılder, aktsııalar men kompanııalardyń úlesteri, temirjol joldary men aqsha qarajattary kiredi, sonyń ishinde sheteldikter de bar.
Buǵan deıin Almatyda Qaırat Satybaldyǵa tıesili bolǵan Kaisar Plaza bıznes-ortalyǵynyń 61,5 mlrd teńgege saýdaǵa shyǵarylǵanyn habarlanǵanbyz.
Qaıtarylǵan aktıvterdi basqarý kompanııasy tıisti lotty elektrondy saýda alańyna ornalastyrǵan. Bul bıznes-ortalyq Jeltoqsan kóshesi, 115 mekenjaıynda ornalasqan.