Almaty soty jelide taraǵan sýdıanyń vıdeosyna qatysty túsinik berdi

ALMATY. KAZINFORM — Áleýmettik jelide sýdıanyń túsiniksiz qımyl jasaǵan sáti túsirilgen vıdeo tarady. 

Kadrda Almatynyń mamandandyrylǵan aýdanaralyq qylmystyq ister jónindegi sotynyń sýdıasy Baqythan Bákirbaev ekeni aıtylady.

Almaty sottarynyń resmı jaýabyna sáıkes, vıdeo 2024 jyly aty shýly qylmystyq is boıynsha ótken otyrystan alynǵan. Ol kezde úsh aıyptalýshyǵa qatysty bultartpaý sharasyn ózgertý týraly ótinish qaralǵan.

Sottyń habarlaýynsha, otyrys barysynda protseske qatysýshylardyń biri zaldan shyqpaq bolǵan. Sýdıanyń jasaǵan qımyly tártipti saqtap, protsestiń durys ótýin qamtamasyz etýge baǵyttalǵany aıtyldy.

— Ótinishti qaraý qorytyndysy boıynsha sot aıyptalýshylarǵa qatysty qamaýda ustaý túrindegi bultartpaý sharasyn qoldanýdan bas tartty. Qylmystyq istiń máni boıynsha sot aqtaý úkimin shyǵardy. Bul úkim joǵary turǵan sotpen ózgerissiz qaldyrylyp, zańdy kúshine endi, — delingen habarlamada.

Sonymen qatar is qaraý kezinde sýdıanyń áreketine qatysty shaǵymdar túsip, Sýdıalyq ádep jónindegi komıssııa oǵan qoǵamdyq sógis jarııalaǵany belgili boldy.

Eske salaıyq, buǵan deıin áleýmettik jelide Shymkent sotynyń sýdıasy Ábinur Qarabaevtyń BAQ ókiline qarap aýzyn qısaıtqanyn vıdeosy taraǵan edi. Keıinirek onyń bul áreketine qatysty qyzmettik tekserý taǵaıyndalǵany habarlandy.