Almaty isker qalalardyń álemdik reıtınginde 10 satyǵa kóterildi
ALMATY. KAZINFORM – Almaty International Congress and Convention Association (ICCA) qaýymdastyǵynyń jyl saıynǵy reıtınginde 10 satyǵa joǵary kóterildi.
Qala ákimdiginiń málimetinshe, bul qalanyń kongrester, konferentsııalar jáne ózge de iskerlik is-sharalardy ótkizýge qolaıly ortalyq retindegi bedeli artyp kele jatqanyn kórsetedi.
ICCA – iskerlik týrızm ındýstrııasyndaǵy jetekshi halyqaralyq kommertsııalyq emes qaýymdastyqtardyń biri. Onyń quramyna álemniń 100-ge jýyq elinen 1 100-den astam uıym kiredi. Uıymnyń jyl saıynǵy reıtıngi MICE-týrızmniń damý deńgeıin baǵalaıtyn eń bedeldi halyqaralyq kórsetkishterdiń biri sanalady.
- Almaty Tourism Bureau ICCA qaýymdastyǵyna úsh jyldan beri múshe. Bul Almatyǵa halyqaralyq kásibı qaýymdastyqpen, kongress uıymdastyrýshylarymen jáne salanyń jetekshi seriktesterimen tikeleı baılanys ornatýǵa, sondaı-aq qalanyń iskerlik týrızmdegi áleýetin jahandyq deńgeıde tanytýǵa múmkindik berip keledi, - dep habarlady ákimdikten.
2025 jylǵy ICCA málimetine sáıkes, Almatyda ótken halyqaralyq is-sharaǵa qatysqan bir delegat ortasha eseppen 1 210 AQSh dollar jumsaıdy. Bul somaǵa qonaq úıde turý, tamaqtaný, kólik jáne ózge de qyzmetterge jumsalǵan qarajat kiredi.
Orta eseppen bir halyqaralyq is-shara qala ekonomıkasyna shamamen 327 myń AQSh dollary kóleminde paıda ákeledi. Al 2025 jyldyń qorytyndysy boıynsha Almatyda ótken ICCA is-sharalarynyń jalpy ekonomıkalyq úlesi shamamen 2,94 mln AQSh dollaryna jetken.
Eske salaıyq, Almaty men Astana álemdegi úzdik stýdenttik qalalar reıtınginde joǵarylady.
