Almaty, Shyǵys Qazaqstan, Aqtóbe oblystary úsh jyldan keıin donor óńirge aınalýy múmkin — Serik Jumanǵarın
ASTANA. KAZINFORM — Premer-mınıstrdiń orynbasary — Ulttyq ekonomıka mınıstri Serik Jumanǵarın keleshekte respýblıkalyq bıýdjetke qarjy aýdaratyn donor óńirlerdiń qatary úsh jańa oblyspen tolyǵýy múmkin ekenin aıtty.
Májilistiń jalpy otyrysynda depýtat Sergeı Ponomarev eldiń óńirlerdiń ekonomıkalyq kórsetkishteri úzdiksiz jaqsaryp jatqany ras bolsa, nege donor oblystardyń qatary artpaı jatqanyn suraǵan.
— Onyń sebebi kóp. Kirispen birge shyǵys ta ósip jatyr. El aýmaǵy úlken. Tarıhqa qarasaq, óńirler túrli jolmen damyǵan. Óńirlerdiń donorǵa aınalýy uzaq protsess. Shynyn aıtsaq, biz ony údetýge qulshynyp otyrǵan joqpyz. Mysaly, Mańǵystaý oblysy buryn da donor bolǵan. Bul jańalyq emes biz úshin. Pavlodar oblysynda qýatty ónerkásip toraby bar. Birinshi kezekte, óńirlerdiń óz-ózin asyraı alatynyna kóńil bólinip jatyr. Biz beretin sýbventsııalar aǵymdaǵy qajettilikteri men jeke kirisiniń aıyrmashylyǵyn jabýǵa ǵana baǵyttalyp otyr. Osy aıyrmadan artyq eshqandaı sýbventsııa bermeýimiz kerek. Óńirlerge qosymsha qarjy bermeýimiz kerek, — dedi vıtse-premer.
Serik Jumanǵarın jergilikti ákimdiktiń negizgi jumysy óziniń salyq túsimin molaıtý ekenin eske saldy.
— Turaqty salyqtyń bárin óńirlerdiń ózine bergenbiz. Bıyl aktsızderdi kóterip, ony da berdik. Tek turaqsyz salyqtar ǵana ortalyqqa túsedi. Sondyqtan óńirlerdiń damýy birinshi kezekte ony basqaryp otyrǵan adamdardyń qolynda.
Degenmen aımaqtardy damytý máseleleri respýblıka deńgeıinde de pysyqtalyp otyrady. Mysaly, Almaty oblysynda Alatau City qalasy qurylyp jatyr. Ol joba Almaty oblysy men Almaty qalasynyń aglomeratsııasyn damytýǵa tikeleı septigin tıgizedi. Tipti Jetisý oblysyn da qamtıdy.
Kelesi úsh jyldyqta Almaty oblysy, Shyǵys Qazaqstan Aqtóbe oblystary donor óńirler qataryna qosylýy múmkin. Onyń bári osy óńirlerdegi iri ınvestıtsııalyq jobalardyń qalaı iske asatynyna baılanysty, — dedi Ulttyq ekonomıka mınıstri.
Buǵan deıin donor óńirler aldaǵy úsh jylda respýblıkalyq bıýdjetke 3,3 trln teńge bóletinin jazǵan edik.