Almaty-Sháýeshek avtobýs baǵyty ashyldy

Qytaıdyń Sháýeshek qalasy men Almatyny baılanystyratyn halyqaralyq avtobýs baǵyty 15 naýryz kúni iske qosyldy, dep habarlaıdy KazInform tilshisi Qytaıdyń Tarbaǵataı aımaqtyq ákimdiginiń resmı saıtyna silteme jasap.

Atalǵan baǵytty «Shynjań Sınta jolaýshy tasymaly» jaýapkershiligi shekteýli kompanııasy iske asyrady. Avtobýs Sháýeshek qalasynan attanyp, Baqty kedendik beketi arqyly Qazaqstanǵa ótkennen keıin, Almatyǵa jol tartady.

— Jańa halyqaralyq baǵyttyń qashyqtyǵy shamamen 900 shaqyrym, Sháýeshekten shyqqan avtobýs Almatyǵa 13 saǵatta jetedi. Jospar boıynsha, bastapqy kezeńde avtobýs aptasyna eki ret qatynaıdy, aldaǵy ýaqytta jolaýshylar aǵynyna baılanysty reıster sany arttyrylmaq. Bılet baǵasy bir adamǵa 330 ıýan (shamamen 22,400 teńge), bul jolaýshylardyń shyǵynyn azaıtýǵa septigin tıgizedi, — deıdi Sınta kompanııasynyń basshysy Ma Tszıýn.

Sháýeshek — Qytaıdyń soltústik-batys aımaǵyndaǵy mańyzdy shekaralyq qalalardyń biri. Almaty-Sháýeshek halyqaralyq avtobýs baǵytynyń ashylýy eki el turǵyndary úshin yńǵaıly kólik qyzmetin usynýmen qatar, Qytaı men Qazaqstan arasyndaǵy saýda-ekonomıkalyq jáne mádenı baılanystardy damytýǵa jańa múmkindik beredi.

Aıta ketelik 20-25 naýryz kúnderi týrıster áz-Naýryzdy birden eki elde – Qazaqstan men Ózbekstanda qarsy alady.