Almaty shatqaldarynda taý klasteri jobasynyń qurylysyna daıyndyq bastaldy

«Almaty Tau Management» JShS málimetinshe, Almaty taý klasteri jobasyn júzege asyrý praktıkalyq kezeńge ótti. Daıyndyq jumystary «Shymbulaq» kýrortynda, sondaı-aq Butaqty jáne Kimasar shatqaldarynda bastaldy.

— «Shymbulaqta» eki jańa kótergish — tórt oryndyq aspaly jol men súıretpeli kótergish salynyp jatyr. Olar kýrorttyń ótkizý qabiletin arttyrýǵa, kelýshiler sanyn tıimdi bólýge jáne shańǵy tebý jaılylyǵyn jaqsartýǵa múmkindik beredi, — dep habarlady kompanııadan.

Al Butaqty shatqalynda bolashaq aspaly jol stantsııalaryna arnalǵan alańdar daıyndalyp, ınjenerlik-geologııalyq zertteýler júrgizilip jatyr. Qurylys tehnıkasynyń júrýi jáne ınjenerlik jelilerdi tartý úshin «Butaqty — 2000 m» baǵyty boıynsha tehnologııalyq jol salý jumystary bastaldy. «Almaty Tau Management» JShS bul negizgi qurylys-montaj jumystaryna kirispes buryn atqarylatyn qajetti kezeń ekenin atap ótti. Ol shamamen 2–3 aptaǵa sozylady.

Sondaı-aq Kimasar shatqalynda bolashaq bazalyq stantsııa ornalasatyn qurylys alańy daıyndalǵan.

— Barlyq ýchaskede jasyl jelekter zerttelip jatyr. Mamandar aǵashtardyń qazirgi jaǵdaıy men ornalasýyn tirkep, keıingi jobalaý kezinde tabıǵı landshaftty eskerýge jáne oǵan áserdi barynsha azaıtýǵa mán beredi. Aǵashtardy tańbalaý — olardy zertteý jáne esepke alý rásiminiń bir bóligi, — dep túsindirdi «Almaty Tau Management».

Eske salaıyq, Almaty taý klasteri «Shymbulaq» pen «Oi-Qaragai» kýrorttaryn aspaly joldar men taý shańǵysy trassalarynyń biryńǵaı júıesi arqyly biriktirýdi kózdeıdi.

Oǵan deıin shilde aıynyń basynda Kókjaılaýda Almaty SuperSki kýrortynyń qurylysy bastaldy.