Almaty Seýl metrosyndaǵy Eastar Jet jarnamalyq naýqanynda tanystyryldy
ASTANA. KAZINFORM — 2026 jyldyń mamyr aıynan bastap Visit Almaty brendi Ońtústik Koreıanyń Eastar Jet áýe kompanııasy júzege asyryp jatqan halyqaralyq jarnamalyq naýqan aıasynda Seýl metrosynda tanystyrylyp jatyr, dep habarlaıdy Almaty ákimdiginiń baspasóz qyzmeti.
Almatyǵa arnalǵan jarnama Gimpo Airport Station stantsııasyna ornalastyryldy. Bul kún saıyn ishki jáne halyqaralyq baǵyttar boıynsha myńdaǵan jolaýshy qatynaıtyn Seýldegi eń iri kólik toraptarynyń biri.
— Joba Eastar Jet áýe kompanııasynyń qoldaýymen óteýsiz negizde júzege asyrylyp, Almatynyń týrıstik áleýetin Ońtústik Koreıa naryǵynda nasıhattaýǵa baǵyttalǵan birlesken marketıngtik strategııanyń mańyzdy bóligine aınaldy, — delingen habarlamada.
Qazirgi tańda Ońtústik Koreıa Almaty úshin basym halyqaralyq týrıstik naryqtardyń biri sanalady. 2025 jyldyń qorytyndysy boıynsha qalaǵa Ońtústik Koreıadan 23,2 myńnan astam týrıst kelgen. Bul kórsetkish koreıalyq saıahatshylardyń Almatyǵa degen qyzyǵýshylyǵynyń turaqty túrde artyp kele jatqanyn ańǵartady.
Visit Almaty brendiniń Seýldiń halyqaralyq kólik ınfraqurylymynda nasıhattalýy Almatynyń halyqaralyq deńgeıdegi tanymaldylyǵyn arttyryp, qalanyń Ortalyq Azııadaǵy jetekshi týrıstik baǵyttardyń biri retindegi bedelin nyǵaıta túspek.
Budan buryn Almatyda bir baǵytty kóshelerdiń sany kóbeıýi múmkin ekenin jazǵanbyz.
