Almaty saıahattaýǵa turarlyq eń úzdik oryndar tizimine endi

ASTANA. KAZINFORM — CNN Travel nusqasy boıynsha Qazaqstan 2025 jyly saıahattaýǵa turarlyq eń úzdik oryndar tizimine endi, dep habarlaıdy Týrızm jáne sport mınıstrligi.

CNN Travel 2025 jyly saıahattaýǵa turarlyq 25 baǵyttyń tizimin jarııalap, Qazaqstandy erekshe mártebege laıyq dep tanydy. Atap aıtqanda, Almaty qalasy saıahattaýǵa tıis eń úzdik baǵyttardyń qataryna endi.

Qala keń tabıǵı landshafttar men damyp kele jatqan ýrbanıstik mádenıetti biriktiretin erekshe atmosferasynyń nátıjesinde Ortalyq Azııanyń «jańa stıl astanasy» dep ataldy.

CNN Travel atap ótkendeı, Almaty — dámi til úıiretin taǵamdardan bastap, túngi ómir, zamanaýı óner men mádenıeti órkendep kele jatqan álemdegi sırek qalalardyń biri.

Sonymen qatar, Tıan-Shan taýlarynyń eteginde ornalasýy saıahatshylarǵa tabıǵattyń taza sulýlyǵyna ońaı qol jetkizýge múmkindik beredi. Qalanyń basty kórikti jerlerine metropolıten stantsııalary, Ábilhan Qasteev atyndaǵy Memlekettik óner mýzeıi men 2025 jyly jańa ǵımaratqa kóshetin «Tselınnyı» zamanaýı mádenıet ortalyǵy jatady.

Sondaı-aq, Almaty Neo Nomad ashanasynyń otany bolyp sanalady. CNN Travel Medeý ańǵaryndaǵy AUYL meıramhanasyn erekshe usynyp, gastronomııalyq saıahatty dál osy jerden bastaýǵa keńes beredi.

Redaktorlar Almatyǵa jetý burynǵydan da ońaı bola túskenin atap ótken. Qala Eýropa, Azııa jáne Taıaý Shyǵys elderimen tikeleı áýe reısterimen baılanysady.

Budan bólek, Qazaqstan kóptegen el, sonyń ishinde AQSh, Kanada, Aýstralııa jáne Ulybrıtanııa azamattary úshin vızasyz rejım usynady. Almaty óziniń biregeı mádenıeti, tabıǵı baılyǵy jáne zamanaýı erekshelikterimen Ortalyq Azııanyń jetekshi týrıstik ortalyǵy mártebesin nyǵaıta túsýde.

Tolyq tizimdi myna silteme arqyly kóre alasyz.

Aıta keteıik, buǵan deıin Qytaıdaǵy Qazaqstan týrızmi jyly ishki týrızmge qandaı serpin bergenin zerttep kórdik.