Almaty Qatar Travel Mart 2025 kórmesinde týrıstik áleýetin sátti tanystyrdy
ALMATY. KAZINFORM — Almaty Doha qalasynda (Katar memleketi) ótken óńirdegi eń iri týrıstik kórmelerdiń biri — Qatar Travel Mart 2025 kórmesine qatysýyn aıaqtady. Іs-sharaǵa 60-tan astam elden týrızm ındýstrııasynyń kásibı ókilderi qatysty.
Kórme halyqaralyq baılanysty nyǵaıtýǵa, qalanyń týrıstik áleýetin keńinen tanystyrýǵa jáne jańa naryqtarǵa shyǵýǵa múmkindik bergen mańyzdy alańǵa aınaldy.
Almaty tórt maýsym boıy saıahattaýǵa qolaıly baǵyt retinde usynyldy: tumsa tabıǵat, belsendi demalysqa arnalǵan zamanaýı múmkindik, wellness-baǵyttar, gastronomııalyq usynystar jáne iskerlik is-sharalarǵa arnalǵan damyǵan ınfraqurylym keńinen kórsetildi.
Kórme aıasynda Almaty delegatsııasy B2B formatynda 150-den astam kelissóz júrgizdi. Sonyń nátıjesinde óńirdiń jetekshi týroperatorlary jáne áýe tasymaldaýshylarymen yntymaqtastyq jóninde aldyn ala ýaǵdalastyq jasaldy. Kelissóz qorytyndysy boıynsha 36 kelisimge qol qoıylyp, olardyń júzege asýy Almatyǵa túrli elderden 5 000-nan astam týrıst tartýǵa múmkindik beredi.
— Bul óńirden keletin týrıster úshin eń basty qyzyǵýshylyq — tabıǵat. Almaty taýy, kóli, jasyl saıabaqtary jáne jazǵy salqyn klımaty arqyly osy talapqa tolyq saı keledi. Arab elderinen qyzyǵýshylyqtyń artyp kele jatqanyn kórip otyrmyz jáne ony odan ári kúsheıtýge nıettimiz, — dedi Almaty qalasynyń Týrızm basqarmasy Týrızmdi ilgeriletý bóliminiń basshysy Erkebulan Ábihan.
Kórmedegi baǵdarlamanyń erekshe bóligi retinde roýd-shoý uıymdastyryldy. Qazaqstannyń bes týroperatory Parsy shyǵanaǵy naryǵyna arnalǵan týrıstik ónimderin tanystyrdy. Іs-sharada Qazaqstan Respýblıkasynyń Dohadaǵy Bas konsýldyǵynyń ókili quttyqtaý sóz sóıledi. Roýd-shoýǵa Ortalyq Azııa elderiniń elshilikteri, jergilikti týrıstik kompanııalar, BAQ jáne seriktes uıymdardan 130-dan astam qonaq qatysty. Bul kezdesý formaty áleýetti klıenttermen tikeleı baılanys ornatýǵa jáne Almatynyń týrıstik múmkindikterine qyzyǵýshylyqty arttyrýǵa jaǵdaı jasady.
QTM 2025 kórmesine qatysý Almaty qalasyn sheteldik naryqtarda ilgeriletýge baǵyttalǵan uzaq merzimdi strategııanyń bir bóligi boldy. Kelesi kezeńde seriktestik baılanysty damytý, birlesken jobalardy júzege asyrý jáne Parsy shyǵanaǵy elderiniń týrısteri arasynda Almatyny jaıly, qaýipsiz ári tabıǵı tartymdy baǵyt retinde turaqty qyzyǵýshylyqty qalyptastyrý jumysy jalǵasady.
