Almaty prokýratýrasy «Orda» saıtynyń bas redaktoryna eskertý jasady

ALMATY. KAZINFORM – Almaty qalalyq prokýratýrasy keıingi kezderi onlaın-platformalarda jalǵan aqparat taratý faktileri bolǵanyn habarlady.

– Keıingi ýaqytta onlaın-platformalarda jalǵan aqparattyń taralý derekteri tirkeldi. Osyndaı jarııalanymdardan keıin «Orda» aqparattyq-taldaý arnasynyń bas redaktory G.A. Bajkenovaǵa qala prokýratýrasy Qazaqstan Respýblıkasynyń «Mass-medıa týraly» Zańynyń talaptaryn aýyzsha jáne jazbasha túrde túsindirdi. 

Sonymen qatar el zańdaryn buzýdyń jol berilmeıtini jáne qasaqana jalǵan aqparat taratqany úshin Qazaqstan Respýblıkasy Qylmystyq kodeksiniń 274-baby 2-bóliginiń 3-tarmaǵyna sáıkes 3 jylǵa deıingi merzimge bas bostandyǵynan aıyrý jazasy kózdelgeni týraly qatań eskertildi.

Odan bólek azamatty sybaılas jemqorlyq, aýyr nemese asa aýyr qylmys jasady dep qasaqana jalǵan aıyptaý derekteri boıynsha Qazaqstan Respýblıkasy Qylmystyq kodeksiniń 419-baby 3-bóligine sáıkes 8 jylǵa deıingi merzimge bas bostandyǵynan aıyrý túrindegi qylmystyq jaýaptylyq qarastyrylatyny túsindirildi, - delingen Almaty qalasy prokýratýrasynyń habarlamasynda. 

Qala prokýratýrasy osyǵan oraı azamattardy jáne buqaralyq aqparat quraldaryn Qazaqstan Respýblıkasynyń zańdaryn qatań saqtaýǵa jáne qoǵamdyq ortada, onyń ishinde BAQ-ta jalǵan, shyndyqqa sáıkes kelmeıtin málimetterdi taratpaýǵa qatań túrde shaqyrady.