Almaty polıtsııasy jas túlekter men ata-analarǵa úndeý jasady
ALMATY. KAZINFORM – Búgin Almatydaǵy jalpy bilim beretin mektepterde túlekterge attestat tapsyrý rásimi ótip jatyr. Osyǵan oraı megapolıs polıtsııasy jas túlekter men ata-analarǵa úndeý jasady.
«Bul kúndi jaqsy kóńil-kúımen aıaqtaý óte mańyzdy. Sondyqtan polıtseıler qoǵamdyq tártip pen jol qaýipsizdigin saqtaýǵa baǵyttalǵan birqatar sharany qolǵa aldy. Qyzmetter men bólimshelerdiń is-áreketterin úılestirý, jaǵdaıdyń yqtımal ózgeristerine der kezinde den qoıý úshin bizdiń bólimshede jedel shtab quryldy. Patrýldik jasaqtardy ornalastyrý jáne profılaktıkalyq jumystar kúsheıtildi. Sonymen qatar bul sharalar kámeletke tolmaǵandardyń qatysýymen jasalatyn quqyq buzýshylyqtardyń jolyn kesýge baǵyttalǵan», - dedi Almaty qalalyq PD jergilikti polıtsııa qyzmeti basqarmasynyń bastyǵy Serik Shýmaev.
Polıtsııa ókili júrgizýshilerdi jol qozǵalysy erejelerin qatań saqtaýǵa shaqyrdy.
Almaty bilim basqarmasynyń málimetinshe, bıyl mektepti 16 myńǵa jýyq túlek aıaqtap jatyr. Onyń ishinde 433-i «Altyn belgi» attestatyna, 1 392 oqýshy úzdik attestatqa úmitker.
