Almaty polıtsııasy izdeýde júrgen esirtki taratýshylardy ustaý isine turǵyndardy da tartpaq
ALMATY. KAZINFORM – Qala polıtsııasy esirtki qylmystaryna qatysy bar, izdeýde júrgen adamdardyń fotoposterlerin taratýdy bastady.
Onda kúdiktiler týraly qysqasha málimet pen turǵyndardy aqparat berýge shaqyratyn eskertý kórsetilgen.
Almaty polıtsııa departamentiniń Esirtki qylmystaryna qarsy is-qımyl basqarmasy bul shara izdeý jumystaryn jedeldetýge baǵyttalǵanyn málimdedi.
Basqarma bastyǵy Murat Jumabaevtyń sózinshe, bastamanyń maqsaty – qala turǵyndaryn saq bolýǵa úndep, qaýipti quqyqbuzýshylyqtardyń aldyn alý.
– Mundaı posterlerdi jarııalaý esirtki qylmystaryna qatysy bar tulǵalardy izdeýdi tıimdirek uıymdastyrýǵa baǵyttalǵan. Qala turǵyndaryn saq bolýǵa jáne izdeýdegi tulǵalar týraly kez kelgen aqparatty habarlaýǵa shaqyramyz. Birlesken áreket arqyly Almaty kóshelerin qaýipsiz etý – basty maqsat. Qylmys úshin jaýapkershilik bar jáne árbir quqyq buzýshy zań aıasynda tabylyp, jaýapqa tartylady, - dedi ol.
Eske salaıyq, buǵan deıin Almatyda esirtki taratqan ınternet-dúkenniń qyzmeti toqtatylǵanyn habarlaǵanbyz.