Almaty polıtsııasy úısizderdi Qonaevqa áketý týraly derekti tekserip jatyr

ALMATY. KAZINFORM — Áleýmettik jelide tártip saqshylary úısizderdi, onyń ishinde arbaǵa tańylǵan adamdardy Almatydan Qonaevqa aparyp tastaǵany týraly aqparat tarady.

Almaty qalasy Polıtsııa departamenti bul derekke qatysty málimdeme jasady.

— Qazirgi ýaqytta atalǵan derekke qatysty tergeý júrip jatyr. Sonymen qatar áleýmettik jáne medıtsınalyq qyzmettermen birlese otyryp, profılaktıkalyq is-sharalar, onyń ishinde turǵylyqty jeri joq adamdardy anyqtaýǵa baǵyttalǵan sharalar turaqty túrde júrgiziletinin habarlaımyz. Polıtsııa qyzmetkerleriniń barlyq is-áreketi qoldanystaǵy zańnama aıasynda júzege asyrylady. Sondaı-aq adamdardy eshqandaı jaǵdaısyz kóshede qaldyryp jatyr degen aqparat shyndyqqa janaspaıtynyna nazar aýdarǵymyz keledi, — dep habarlady departamentten.

Eske salaıyq, byltyr Almatyda úısiz-kúısiz adamdardy urlap, nesıe rásimdetken qylmystyq top quryqtaldy.