Almaty polıtsııasy turǵyndardyń keıbiri kóliginen nege aıyrylǵanyn túsindirdi

ALMATY. KAZINFORM — Almatyda mıllıondap aıyppul tólemegen avtokólik ıeleri anyqtaldy.

Almatyda jol qozǵalysyna qatysýshylardyń tártibin kúsheıtýge jáne jaýapkershiliktiń bultartpastyǵyn qamtamasyz etýge baǵyttalǵan «Qaýipsiz jol» respýblıkalyq jedel-profılaktıkalyq is-sharasy aıaqtaldy.

Іs-shara aıasynda ákimshilik polıtsııanyń izdestirý bólimshesiniń qyzmetkerleri ákimshilik aıyppuldardy júıeli túrde tóleýden jaltaryp júrgen júrgizýshilerdi anyqtaý boıynsha jumystar júrgizdi. Negizgi nazar iri kólemdegi bereshegi bar kólikterge aýdaryldy.

Júrgizilgen sharalardyń nátıjesinde birneshe avtokólik ustaldy. Bul kólikter boıynsha tólenbegen aıyppuldardyń jalpy somasy 10 mln teńgeden asty. Barlyq kólik quraly qaryz tolyq ótelgenge deıin arnaıy aıyp turaǵyna qoıyldy.

— Aıyppuldardy júıeli túrde tólemeý — zań talaptaryn sanaly túrde elemeý. Mundaı jaǵdaılarda qabyldanatyn sharalar qaǵıdatty ári bultartpas bolady, — dedi Almaty polıtsııa departamenti ákimshilik polıtsııa basqarmasynyń bastyǵy Serik Shýmaev.

Polıtsııa ókili sondaı-aq ákimshilik qaýlylardyń oryndalýyn baqylaý jol qaýipsizdigin qamtamasyz etýdiń mańyzdy bóligi ekenin aıtty.

— Árbir júrgizýshi aıyppuldyń jaı formaldylyq emes ekenin túsinýge tıis. Zańdy talaptardy oryndamaý naqty saldarǵa, tipti kólik quralyn alyp qoıýǵa deıin ákelýi múmkin, — dedi Serik Shýmaev.

Polıtsııa turǵyndardy aıyppuldardy ýaqtyly tóleý qosymsha shekteý sharalarynyń aldyn alatynyn eske salyp, avtokólik ıelerin bereshektiń bar-joǵyn aldyn ala tekserýge úndedi.

Eske salaıyq, buǵan deıin Almatyda 5 jylda «Sergek» kameralary 156 mlrd teńge aıyppul salǵanyn jazǵanbyz.