Almaty polıtsııasy smart-kózildiriktiń kómegimen izdeýde júrgen adamdy anyqtady

ALMATY.KAZINFORM - Almatyda bıometrııalyq beınetaldaý fýnktsııasy bar AR-aqyldy kózildirik synaqtan ótkizildi.

Almaty polıtsııasy smart-kózildiriktiń kómegimen izdeýde júrgen adamdy anyqtady
Foto: vıdeodan alynǵan skrın

Almaty polıtsııasy zamanaýı tsıfrlyq tehnologııalardy engizýdi jalǵastyryp keledi. Sonyń biri – bıometrııalyq beınetaldaý fýnktsııasy bar AR-aqyldy kózildirik. Ol adamnyń bet-álpetin vedomstvolyq derekqorlar arqyly jedel tekserýge múmkindik beredi.

Qurylǵy ázirge bir dana kóleminde pılottyq rejımde qoldanylyp jatsa da, alǵashqy nátıjesin kórsetti.

- Jaqynda Almatydaǵy meshitterdiń birinde aqyldy kózildiriktiń kómegimen izdeýde júrgen er adam anyqtaldy. Aqparat rastalǵannan keıin ol ustalyp, tıisti organǵa tapsyryldy, - dep málimdedi Almaty PD.

Tehnologııa polıtsııa qyzmetkerine izdeýdegi adammen yqtımal sáıkestik týraly aqparatty smartfon nemese planshet qoldanbaı-aq, tikeleı kózildirik ekranynan kórýge múmkindik beredi.

Jańa tehnologııany engizý izdestirý jumystarynyń tıimdiligin arttyrýǵa, polıtsııanyń jedel áreket etýine jáne qoǵamdyq qaýipsizdikti qamtamasyz etýge baǵyttalǵan.

Eske salsaq, Almaty oblysynda polıtseıler kólikti toqtatý úshin qarý qoldanǵan edi.