Almaty polıtsııasy sheteldik kompanııalardy kólik nómirin saryǵa aýystyrýǵa shaqyrdy

ALMATY. KAZINFORM – Almaty polıtsııasy sheteldik kompanııalarǵa tıesili kólikterdiń memlekettik nómirine qatysty málimdeme jasady.

Vedomstvodan málim etkendeı, júrgizilgen taldaý nátıjesine memlekettik tirkeý nómirlik belgileriniń keıbir jaǵdaıda belgilengen úlgige sáıkes kelmeıtini anyqtaldy.

QR Іshki ister mınıstrliginiń bekitilgen mehanıkalyq kólik quraldaryn tirkeý jáne tirkeýden shyǵarý qaǵıdalaryna sáıkes, sheteldik uıymdarǵa tıesili kólikterge menshik túrine qaramastan sary tústi memlekettik tirkeý nómirlik belgileri beriledi.

– Atalǵan sáıkessizdikterdi joıý jáne tirkeý derekterin belgilengen talaptarǵa sáıkestendirý maqsatynda kórsetilgen kólik quraldarynyń ıelerinen (ókilderinen) arnaıy halyqqa qyzmet kórsetý ortalyqtaryna (Arnaıy HQKO) baryp, nómirlik belgilerdi aýystyrýdy suraımyz, - delingen habarlamada.

Bul rásim jumys tártibinde júzege asyrylady jáne menshik quqyǵyn rastaıtyn, sondaı-aq kólik quralynyń zańdy tulǵaǵa tıesili ekenin dáleldeıtin qujattardan basqa qosymsha negizderdi talap etpeıdi.

– Osy sharaǵa túsinistikpen qaraýlaryńyzdy suraımyz. Bul kólik quraldaryn memlekettik tirkeýdiń biryńǵaı standarttaryn saqtaý maqsatynda júzege asyrylyp otyr.Qosymsha keńes alý qajet bolǵan jaǵdaıda Almaty qalasy Ákimshilik polıtsııa basqarmasynyń protsessıng ortalyǵyna habarlasýyńyzǵa bolady, - dep atap ótti polıtsııadan.

Buǵan deıin Almatyda moped júrgizýshisi polıtsııa qyzmetkerin qaǵyp, oqıǵa ornynan qashpaq bolǵany týraly jazǵanbyz.