Almaty polıtsııasy Respýblıka kúni qarsańynda kúsheıtilgen rejımge kóshedi

ALMATY. KAZINFORM – Almaty polıtsııasy Respýblıka kúni qarsańynda, ıaǵnı 25 qazan kúni kúsheıtilgen qyzmet atqarý tártibine kóshedi. Qoǵamdyq tártipti saqtaýǵa mereke kúnderi 3,5 myń polıtseı jumyldyrylady.

Bul týraly Almaty polıtsııa departamentiniń resmı ókili Saltanat Ázirbek aıtty.

Onyń sózinshe, Almatydaǵy krımınogendik jaǵdaı turaqty jáne baqylaýda. Onyń dáleli – qylmys deńgeıiniń 12% tómendeýi. Sondaı-aq aýyr jáne asa aýyr qylmystardyń ashylý kórsetkishi de jaqsarǵan.

– Mereke kúnderi ishki ister organdarynyń jeke quramy kúsheıtilgen rejımde qyzmet atqarady. Barlyq bólimshe – patrýldik polıtsııa, ýchaskelik ınspektorlar, ıývenaldy jáne kóshi-qon qyzmeti, kınologtar men jedel bólimsheler jumysqa tartylady, - dedi Saltanat Ázirbek.

Qoǵamdyq kólikte jáne azamattar kóp jınalatyn oryndarda – saıabaqtarda, alańdarda, saýda-oıyn-saýyq ortalyqtarynda baqylaý kúsheıtiledi.

Vedomstvonyń resmı ókiliniń aıtýynsha, qalada kólik qozǵalysyn shekteý josparlanbaǵan. Bul másele merekelik is-sharalar ótkizý kezindegi jaǵdaıǵa baılanysty sheshiledi.

Eske salaıyq, buǵan deıin Almatyda Respýblıka kúni qalaı atap ótiletinin jazǵanbyz.

Almaty ákimdiginiń málimetinshe, qalada kontsert, sporttyq jarystar, ekologııalyq aktsııalar men patrıottyq kezdesýler uıymdastyrylady. Jalpy megapolıste 100-den astam is-shara ótedi.