Almaty polıtsııasy mektep túlekterine úndeý jasady
ALMATY. KAZINFORM — Sońǵy qońyraý qarsańynda Almaty qalasynyń polıtsııasy mektep túlekteriniń ata-analary men ustazdaryna úndeý jasady.
Almaty qalasy polıtsııa departamenti Qoǵamdyq qaýipsizdik basqarmasynyń bastyǵy Tımýr Noǵaıbaev bul kúnderi balalardyń qaýipsizdigin qamtamasyz etý men quqyq buzýdyń aldyn alý máselesine erekshe nazar aýdarylatynyn atap ótti.
Onyń aıtýynsha, jyl saıyn kottedjderdi jalǵa alý, alkogoldik ishimdikterdi paıdalaný, sondaı-aq kortejdermen qaýipti manevr jasaý derekteri tirkeledi.
— Jasóspirimder áserli beınerolık túsiremiz dep jol qozǵalysy erejelerin óreskel buzǵan jaǵdaıda onyń sońy qaıǵyly jaǵdaıǵa ákelýi múmkin. Polıtsııa qyzmetkerleri kúsheıtilgen rejımde jumys isteıdi. Degenmen, ata-analar men pedagogterdiń qoldaýynsyz balalardyń qaýipsizdigin tolyq qamtamasyz etý múmkin emes, — dedi Tımýr Noǵaıbaev.
Sonymen qatar ol ata-analarǵa balalaryn baqylaýsyz qaldyrmaý jáne olardyń avtokólikpen júrýine jol bermeý kerek ekenin eskertti.
Eske salaıyq, byltyr Almaty oblysynda mektep túlekteriniń avtokorteji jol erejesin óreskel buzdy. Bul derek boıynsha sotqa 17 zań buzý boıynsha materıaldar jiberildi.
