Almaty polıtsııasy medıtsınalyq kolledjdegi tóbeleske baılanysty tekserý júrgizip jatyr
ALMATY. KAZINFORM — Almaty polıtsııasy qaladaǵy kolledjderiniń birinde bolǵan tóbelesten keıin tekserýdi bastady.
Áleýmettik jelide Almatydaǵy kolledjderdiń birinde úsh stýdenttiń kámeletke tolmaǵan qyzdy uryp-soqqany týraly aqparat tarady. Jábirlenýshiniń ápkesiniń aıtýynsha, qyz aýyr jaraqat alyp, aýrýhanaǵa jetkizilgen.
— Ol qazir Birinshi balalar aýrýhanasynda mı shaıqalýy dıagnozymen jatyr, oń kóziniń kórýi nasharlaǵan, aýrýhanada birneshe ret esinen tanyp qaldy. Ony uryp, tepken, betinde syzattar qalǵan, — dep jazdy ápkesi.
Qyzdyń týystary kolledj ákimshiliginiń otbasyna habar bermegenin, ony oqýdan shyǵaramyz dep qorqytyp jatqanyn aıtty.
Al professor Rýzýddınov atyndaǵy Joǵary medıtsınalyq-stomatologııalyq kolledji ákimshiliginiń habarlaýynsha, 1 jeltoqsanda birinshi kýrs stýdentteri daýlasyp qalǵan. Bul oqıǵaǵa bir qyzdyń anasy aralasqan. Ákimshiliktiń málimetinshe, dál sol áıel agressıvti áreket jasap, dóreki sózder aıtyp, ekinshi stýdentke soqqy jasaǵan. Aqyrynda jedel járdem shaqyrylyp, qazir eki qyz da aýrýhanada jatyr.
Almaty polıtsııa departamenti oqıǵaǵa qatysty túsinik berdi.
Vedomstvonyń málimetinshe, Almaly aýdany polıtsııa basqarmasyna jergilikti turǵyn qyzynyń denesin kolledj stýdenti jaraqattaǵany týraly aryz jazǵan.
— Aryz boıynsha jedel sharalar qabyldandy. Qaqtyǵysqa qatysqan barlyq stýdent anyqtalyp, ata-analarymen birge polıtsııa bólimshesine jetkizildi, — dep málimdedi Almaty polıtsııa departamenti.
Qazirgi ýaqytta qoldanystaǵy zańnamada qarastyrylǵan barlyq protsessýaldyq is-qımyl júrgizilip jatyr. Onyń nátıjesinde olardyń áreketine quqyqtyq baǵa beriledi.
— Materıaldar kámeletke tolmaǵandardyń quqyqtaryn qorǵaý komıssııasyna qaraýǵa jiberiledi. ıÝvenaldyq polıtsııa keshendi is-sharalar júrgizip, ata-analarǵa qatysty ákimshilik sharalar qoldanady. Qylmysqa qatysqan kámeletke tolmaǵandar profılaktıkalyq esepke alynady, — dep naqtylady vedomstvonyń baspasóz qyzmeti.
Polıtsııa departamenti jaǵdaıdy erekshe baqylaýda ustap otyrǵanyn jáne kámeletke tolmaǵandar arasynda quqyq buzýshylyqtardyń aldyn alý sharalaryn qabyldap jatqanyn atap ótti.
Eske salaıyq, buǵan deıin Almatyda balany aıaýsyz tepken er adam qamaýǵa alynǵanyn jazǵan edik.
