Almaty polıtsııasy kúsheıtilgen jumys rejımine kóshti

ALMATY. KAZINFORM — Almaty polıtsııasy qaladaǵy tártipti qamtamasyz etý boıynsha sharalar qabyldady. Jańa jyl merekesine baılanysty tártip saqshylary kúsheıtilgen rejımde jumys isteıdi.

Almaty qalalyq Polıtsııa departamentiniń málimetinshe, jańa jyldy merekeleý kezinde qoǵamdyq tártipti qamtamasyz etý, qylmystardyń, sondaı-aq basqa da zańsyz áreketterdiń der kezinde aldyn alý jáne jolyn kesý maqsatynda Almaty polıtsııasy qyzmettiń kúsheıtilgen nusqasyna kóshirildi. 3 myńnan astam polıtseı qaladaǵy tártipti táýlik boıy kúzetedi.

Patrýldik ekıpajdardyń sany ulǵaıtyldy, qyzmet kórsetý marshrýttary kúsheıtildi, jaıaý patrýldik qyzmetke Ulttyq ulannyń 300 áskeri tartyldy.

— Azamattar kóp jınalatyn oryndar men mádenı-oıyn-saýyq sharalary ótetin oryndar erekshe baqylaýda, — dep habarlady vedomstvodan.

Almaty turǵyndary Jańa jyl merekesin toılaýdy bastap ketti. Qalada túrli kontsertter men is-sharalar, sondaı-aq negizgi jańa jyldyq jármeńke ótip jatyr.

Eske salaıyq, 20 jeltoqsan kúni Almatyda bas shyrshanyń shamdary jaǵyldy.

Sondaı-aq Jańa jyl túni merekelik otshashý bolady. 31 jeltoqsannan 1 qańtarǵa qaraǵan túni megapolıs turǵyndary men qonaqtary merekelik otshashýdy tamashalaı alady. Otshashý demeýshiler esebinen uıymdastyrylady.