Almaty polıtsııasy kúsheıtilgen rejımge kóshti
ALMATY. KAZINFORM – Qazaqstan men Norvegııa arasyndaǵy Ulttar lıgasy matchy qarsańynda Polıtsııa departamentiniń jeke quramy kúsheıtilgen rejımge kóshti.
Polıtseıler ortalyq stadıon men oǵan shektes aýmaqta tártip pen jol qaýipsizdigin qamtamasyz etedi.
«Birinshi kezekte qalamyzdyń turǵyndary men qonaqtaryna keptelisterdi boldyrmaý maqsatynda Abaı dańǵyly, Baıtursynov, Sátbaev, Baızaqov, Qurmanǵazy kóshelerinde jol qozǵalysy jartylaı shekteletinin habarlaımyz. Osyǵan oraı, azamattardy aldyn ala baǵdaryn rettep, kólikterin tek arnaıy belgilengen oryndarǵa qoıyp, jol qozǵalysy erejelerin qatań saqtap, qoǵamdyq kólikti paıdalanýǵa shaqyramyz. Sonymen qatar fýtbol matchyna bıletterdi alaıaqtardan saqtaný maqsatynda tek resmı saýda oryndarynan satyp alý kerektigin eske salamyz», - dedi Almaty qalalyq PD jergilikti polıtsııa qyzmeti basqarmasynyń bastyǵy Serik Shýmaev.
Osyǵan deıin álemdik fýtbol juldyzdary Holand pen Edegor Almatydaǵy stadıonda jattyǵý ótkizgeni týraly jazǵan edik.
