Almaty polıtsııasy kóshedegi kólik jarystary týraly málimdeme jasady
ALMATY. KAZINFORM – Almaty qalasynyń polıtsııa departamenti joldaǵy jaǵdaıdy turaqtandyrý jáne quqyq buzýshylyqtardyń aldyn alý maqsatynda reıd júrgizilip jatqanyn málimdedi.
Polıtsııa málimetinshe, úsh táýlik ishinde qala joldarynda 5 myńnan astam jol qozǵalysy erejesin buzý deregi anyqtalǵan. Mas kúıinde kólik basqarǵan 43 júrgizýshi ustalyp, barlyǵy kólik basqarý quqyǵynan shettetildi. Odan bólek 369 azamattyń kólikti tıisti qujattarsyz basqarǵany belgili bolǵan. Onyń ishinde 94 avtokólik arnaıy aıyp turaǵyna qoıyldy.
- Polıtsııa qyzmetkerleri qaýipti júrgizý, onyń ishinde túngi jarystar derekterin anyqtap, jolyn kesti. Jyldamdyqty shamadan tys arttyrýdyń 2 myńnan astam faktisi tirkeldi. Keıbir júrgizýshiler quqyq buzýshylyqtaryn ádeıi beınejazbaǵa túsirip, áleýmettik jelilerde jarııalaıdy. Alaıda árbir mundaı derek baqylaýda, quqyq buzýshylar anyqtalyp, zań aıasynda jaýapqa tartylady, - dep málimdedi departamentten.
Almaty polıtsııasy mundaı jaǵdaılardyń biri Ál-Farabı dańǵylynda bolǵanyn atap ótti. Júrgizýshi avtokóligin saǵatyna 250 shaqyrym jyldamdyqqa deıin údetken. Nátıjesinde ol jedel túrde ustalǵan. Sot sheshimimen júrgizýshi 10 táýlikke ákimshilik qamaýǵa alyndy.
Eske salaıyq, birneshe kún buryn Almatyda jol apatynan úsh adam qaza tapty.
