Almaty polıtsııasy qoǵamdyq kólikterge «dabyl túımesin» ornatýdy usyndy

Almatylyq polıtseıler qoǵamdyq kólikterge «102» arnasyna shyǵatyn dabyl túımesin ornatýdy usyndy, dep habarlaıdy Kazinform. 

Bul týraly Polıtsııa departamentiniń qyzmetkerleri jolaýshylar tasymalymen aınalysatyn avtobýs parkteriniń ókilderimen kezdesý barysynda tilge tıek etti.

Aıtýlarynsha, oqys jaǵdaıda dabyl birden «102» arnasyna túsedi. Sondaı-aq kólik uıymynyń dıspetcherlik qyzmetine de lezde habar beredi.

Buǵan qosa qalalyq Ákimshilik polıtsııa basqarmasynyń basshylyǵy avtobýstardaǵy beıne jáne dybys jazatyn baqylaý kameralaryn jańartýdy usyndy.

«Basty maqsat – qoǵamdyq kóliktegi kez kelgen quqyq buzýshylyqqa «múldem tózbeýshilik» jáne júrgizýshiler men jolaýshylardyń qaýipsizdigin qamtamasyz etý», - dedi Almaty qalalyq PD ákimshilik polıtsııa basqarmasy bastyǵynyń orynbasary Bolatbek Baıatanov. 

Eske salaıyq, byltyr jeltoqsan aıynyń sońynda avtobýs bir top adamdy qaqqan edi.

Polıtsııanyń málimetinshe, №47-shi baǵyttaǵy qoǵamdyq kóliktiń ishindegi jolaýshy janjal shyǵaryp, júrgizýshi áıeldi urǵan. Saldarynan ol esinen tanyp, kólikti basqara almaı qalǵan.

Apat saldarynan 7 adam zardap shekti. Jedel medıtsınalyq qyzmet kelgenshe úsheýi qaıtys boldy.