Almaty polıtsııasy Qytaıda prank túsirgen blogermen profılaktıkalyq áńgime júrgizdi

ALMATY. KAZINFORM – Polıtsııa qyzmetkerleri Qytaıdan jaqynda oralǵan qazaqstandyqpen profılaktıkalyq jáne túsindirý áńgimesin ótkizdi.

Almaty qalasy polıtsııa departamentiniń málimetinshe, buǵan onyń áleýmettik jelilerde keńinen taralǵan beınerolıkteri sebep boldy.

— Internette taralǵan beınelerdiń birinde ol seriginiń qaltasynan uıaly telefondy alyp, ony ótip bara jatqan Qytaı azamattaryna beredi. Sodan keıin telefondy urlap ketkenin aıtyp, sol adamǵa nusqaıdy. Sonymen qatar ol kóshede jáne metro stantsııalarynda beıtanys er adamdarǵa jaqyndap, qoldarynan nemese aıaqtarynan ustap, aınalasyndaǵylardyń úreıi men túsinbeýshiligin týdyrǵan, — dep habarlady departamentten.

Almaty polıtsııasy áńgime barysynda bloger qyz bolǵan jaǵdaıǵa ókinetinin aıtqan.

— Meniń vıdeom eshkimdi renjitý maqsatynda túsirilmegen. Bul oılanbaı jarııalanǵan materıal boldy. Beınejazbalarym bireýge jaǵymsyz áser etse, keshirim suraımyn. Endi kontentti jarııalaý máselesine muqııat qaraımyn, — dedi ol.

Polıtsııa áleýmettik jelilerde materıal jarııalaý kezinde otandastarǵa da, basqa el azamattaryna da qurmetpen qaraý mańyzdy ekenin eskertti.

— Mundaı áreketter arandatýshylyq retinde qabyldanyp, qoǵamda teris reaktsııa týǵyzýy múmkin, — dedi polıtsııa ókilderi.

Eske salaıyq, buǵan deıin qazaqstandyq bloger Arýjan Aıbekovanyń Qytaıdyń Gýanchjoý qalasynda jáne basqa da aımaqtarynda túsirgen birqatar «prank test» vıdeosy jergilikti jerde synǵa ushyraǵanyn jazǵanbyz.