Almaty polıtsııasy bloger Nazar Rollanǵa nege izdeý jarııalady
ALMATY. KAZINFORM — Almaty polıtsııasy daýly beınejazbalary arqyly tanylǵan 28 jastaǵy bloger Nazar Rollanǵa izdeý jarııalanýyna qatysty túsinik berdi.
Almaty polıtsııa departamentiniń málimetinshe, qazir «Buzaqylyq» deregi boıynsha qylmystyq is tergelip jatyr.
— Buǵan deıin Nazar Rollanǵa qatysty elden ketpeý jáne tıisti tártipti saqtaý týraly qolhat túrindegi bultartpaý sharasy tańdalǵan. Alaıda ol sotqa deıingi tergep-tekserý organyna kelmegen. Tergeý áreketterine qatysýyn qamtamasyz etý úshin oǵan izdeý jarııalandy, — dep habarlady Almaty polıtsııa departamentiniń baspasóz qyzmeti.
Qazir onyń júrgen jerin anyqtaýǵa baǵyttalǵan tıisti jedel-izdestirý sharalary júrgizilip jatyr.
Buǵan deıin 28 jastaǵy bloger Nazar Rollanǵa izdeý jarııalanǵany belgili boldy. Ol buǵan deıin jol qozǵalysy erejelerin buzǵany úshin quqyq qorǵaý organdarynyń nazaryna birneshe ret ilikken.
Nazar Rollan áleýmettik jelilerde jol erejesin buzatyú beınejazbalary arqyly keńinen tanyldy. Atap aıtqanda, 2018 jyly Almatydaǵy ál-Farabı dańǵylynda qarsy baǵyttaǵy jolaqta kólik júrgizip vıdeo túsirdi.
2019 jyly bloger taǵy da ákimshilik jaýapkershilikke tartyldy. Sol kezde Porsche avtokóligin basqarǵan Nazar Rollandy polıtsııa qyzmetkerleri Dostyq kóshesi men Abaı dańǵylynyń qıylysynda toqtatqan. Oǵan «Kólikti alkogoldik mas kúıde basqarǵany» úshin ákimshilik jaza taǵaıyndalyp, 20 táýlikke ákimshilik qamaqqa alynǵany habarlanǵan edi.
