Almaty polıtsııasy áýejaı jolaýshylaryna eskertý jasady

ALMATY. KAZINFORM — Búgin Almaty halyqaralyq áýejaıynyń aýmaǵynda saǵat 09:00–den 17:00–ge deıin josparly antıterrorlyq oqý-jattyǵý ótedi.

Almaty qalasy Polıtsııa departamentiniń málimetinshe, shara kezinde áýe jáne avtokólikterdiń qozǵalysyna shekteýler joq. Oqý-jattyǵý tapsyrmalary adamdar kóp jınalatyn jerlerde lańkestik áreketterdiń aldyn alý mehanızmin jetildirýge baǵyttalǵan.

— Qaýipsizdik sharalaryn saqtaýyńyzdy jáne memlekettik qyzmetkerlerdiń zańdy talaptaryn oryndaýyńyzdy suraımyz. Sondaı-aq resmı aqparat kózderin qadaǵalap, jalǵan aqparat taratpaý kerek, — dep habarlady departamentten.

Sonymen qatar qalalyq polıtsııa QR «Ákimshilik quqyq buzýshylyq týraly» Kodeksiniń 443-babyna sáıkes, qoǵamdyq tártipti qamtamasyz etýge qatysýshy tulǵanyń zańdy talabyna baǵynbaý ákimshilik jaýapkershilikke ákep soǵatynyn eske saldy.

Eske salaıyq, bıyl 7 naýryz kúni Almaty áýejaıynda er adam áýejaı qyzmetkerin kepilge aldy.