Almaty polıtsııasy 365 keli pırotehnıka tárkiledi

ALMATY. KAZINFORM – Almaty polıtsııasy «Pırotehnıka» jedel-aldyn alý sharasy týraly aıtyp berdi.

Almaty qalasy Polıtsııa departamentiniń ákimshilik polıtsııa basqarmasy basshysynyń orynbasary Tımýr Serikulynyń aıtýynsha, qalada «Pırotehnıka» operatsııasy júrgizilip jatyr.

– Qala aýmaǵynda 145 mobıldi top jumys isteıdi. Bizdiń mindetimiz — qaýipti ónimderdi satýdyń aldyn alý jáne ásirese kámeletke tolmaǵandar arasynda jaraqat alý qaýpin boldyrmaý, — dedi Tımýr Serikuly.

19 jeltoqsandaǵy jaǵdaı boıynsha pırotehnıkalyq ónimderdiń 141 qoraby jáne birneshe ret atylatyn «VIP Salıýt» otshashýlarynyń 125 danasy tárkilendi.

– Pırotehnıkany zańsyz satýdyń 22 faktisi anyqtaldy. Tárkilengen ónimniń jalpy salmaǵy 365 keli. Bul baǵyttaǵy jumys jalǵasatyn bolady,– dep atap ótti polıtsııa ókili.

Aıta keteıik, osyǵan deıin SQO-da zańsyz saýdadan 500-den astam pırotehnıkalyq ónim alynǵany habarlandy.