Almaty polıtsııasy 2025 jyly jarty tonnadan astam esirtki tárkiledi
ALMATY. KAZINFORM – Qala aýmaǵynda 2025 jyldyń qorytyndysy boıynsha esirtki quraldarynyń zańsyz aınalymyna qatysty 600-den astam derek anyqtaldy.
Polıtsııanyń habarlaýynsha, anyqtalǵan 280-nen astam derek tikeleı esirtki satý faktilerine qatysty.
Jedel-izdestirý is-sharalarynyń nátıjesinde zańsyz aınalymnan jarty tonnadan astam esirtki zaty tárkilendi. Tárkilengen zattardyń basym bóligin kannabıoıdty toptaǵy esirtkiler, sondaı-aq jastar úshin erekshe qaýipti sıntetıkalyq zattar bolyp shyqty.
Sonymen qatar polıtsııa fıtozerthanalardy anyqtaýǵa erekshe nazar aýdarylǵanyn málimdedi. 2025 jyly qala aýmaǵynda quramynda esirtki bar ósimdikterdi ósirýdiń 17 faktisiniń joly kesildi.
– Bul zańsyz bıznes ókilderiniń qyzmetin jasyryn ári jaqsy búrkemelengen nysandarǵa kóshirýge tyrysatynyn ańǵartady, - delingen habarlamada.
Polıtsııanyń málimetinshe, qazir esirtki qylmysy tsıfrlyq tehnologııalardy – messendjerlerdi, onlaın-platformalardy jáne baılanyssyz satý tásilderin keńinen qoldanyp jatyr. Osyǵan baılanysty esirtkige qarsy kúres kıberqylmysqa qarsy is-qımyl bólimshelerimen birlesip júrgiziledi.
Eske salaıyq, buǵan deıin Almaty men Jetisý oblystarynan esirtki zerthanalary tabylǵanyn jazǵan edik.