Almaty polıtseıleri júrgizýshilerge úndeý jasady
ALMATY. KAZINFORM — Almatylyq polıtseıler jóndeý jumystaryna baılanysty júrgizýshilerdi jolda júrý erejelerin qatań saqtaýǵa shaqyrdy.
«Rysqulov dańǵyly boıymen shyǵys baǵytta Kúderın kóshesinen Bókeıhanov kóshesine deıin kólik qozǵalysyna ýaqytsha shekteý qoıyldy. Atalǵan aımaqtaǵy qozǵalys shyǵysqa qaraı, qarama-qarsy qozǵalys jolaǵynda uıymdastyryldy. Azamattardy jol qozǵalysy erejelerin qatań saqtaýǵa shaqyrady»,- delingen habarlamada.
Eske salaıyq bıyl Almatyda uzyndyǵy 250 km bolatyn 274 kóshege ortasha jóndeý jumystary júrgiziledi. Osylaısha, jaqsy jáne qanaǵattanarlyq jaǵdaıdaǵy joldardyń úlesin 92%-ǵa deıin jetkizý josparlanǵan.
Qalalyq ákimdikten málim etkendeı, qazir 20 magıstraldi kóshede jol tóseminiń beriktigin arttyrý úshin polımerasfaltbeton qoldanylyp jatyr.
Jóndeletin aýmaqtar 36 saǵatqa jabylady, bul ýaqytta qospa sýyp, tıisti talapqa saı qatýy kerek.
«Magıstraldi kóshelerdiń jóndeý jumystary tamyz aıynyń sońyna deıin, al aýdandyq mańyzy bar kóshelerdiń jóndeýi qazan aıynyń sońyna deıin aıaqtalady. Asfaltty qyryp, jańasyn tóseý jumystary túngi ýaqytta júrgizilýde»,- dep atap ótti ákimdikten.
