Almaty polıtseıleri alty kún boıy kúsheıtilgen rejımde jumys isteıdi
ASTANA. KAZINFORM — Almatyda jol qaýipsizdigin baqylaý kúsheıtildi, dep habarlaıdy qalalyq Polıtsııa departamentiniń baspasóz qyzmeti.
11–16 shilde aralyǵynda Almaty qalasynyń aýmaǵynda jol-kólik oqıǵalarynyń aldyn alýǵa, jol qozǵalysyna qatysýshylardyń tártibin arttyrýǵa jáne qoǵamdyq qaýipsizdikti qamtamasyz etýge baǵyttalǵan respýblıkalyq «Qaýipsiz jol» jedel-profılaktıkalyq is-sharasy ótip jatyr.
Alty kún boıy polıtsııa qyzmetkerleri kúsheıtilgen rejımde qyzmet atqaryp, Jol júrisi qaǵıdalaryn óreskel buzý derekterin anyqtaýǵa basa nazar aýdarady. Atap aıtqanda, mas kúıinde kólik basqarý, qarsy qozǵalys jolaǵyna shyǵý, belgilengen jyldamdyqty asyrý, qaýipsizdik beldigin taqpaý, jaıaý júrginshilerdiń jol qozǵalysy qaǵıdalaryn buzýy, sondaı-aq qoǵamdyq kólik, mototsıkl jáne moped júrgizýshileri tarapynan jasalatyn quqyq buzýshylyqtar baqylaýǵa alynady.
— Joldaǵy qaýipsizdik — árbir jol qozǵalysyna qatysýshynyń jeke jaýapkershiliginen bastalady. Bizdiń mindetimiz — quqyq buzýshylyqtardy anyqtap qana qoımaı, qaıǵyly oqıǵalardyń aldyn alyp, adam ómirin saqtap qalý. Barlyq júrgizýshiler men jaıaý júrginshilerdi Jol júrisi qaǵıdalaryn qatań saqtaýǵa shaqyramyz. Zań men tártip — ózara qurmetten bastalatynyn árdaıym este ustaǵan jón, — dedi Almaty qalasy Polıtsııa departamentiniń baspasóz qyzmeti.
Osyǵan deıin Almatyda qaı qylmystar tyıylmaı turǵanyn jazǵan edik.
