Almaty polıtseıleri alaıaqqa 4 mıllıon teńge aýdarmaq bolǵan jigitke tosqaýyl boldy

ALMATY. KAZINFORM — Almaty polıtseıler iri kólemdegi ınternet-alaıaqtyqtyń aldyn aldy. Bul týraly Polisia.kz jazdy.

Kezekshi bólimge jergilikti turǵyn júginip, 21 jastaǵy ulynyń joǵalyp ketkenin habarlaǵan. Jas jigit ózimen birge altyn buıymdar men jınaǵan aqshany alyp, úıinen shyǵyp ketken. Ol birneshe saǵat boıy baılanysqa shyqpaǵan.

Ata-anasy onyń kompıýterindegi kúmándi hat almasýdy baıqap, birden polıtsııaǵa júgingen. Polıtsııa qyzmetkerleri jigittiń ornalasqan jerin anyqtap, onyń ınternet-alaıaqtardyń yqpalynda bolǵanyn anyqtady.

Alaıaqtardyń nusqaýymen ol aqshany aýdarý boıynsha naqty qadamdar jasap jatqan. Ol joǵaltyp ala jazdaǵan soma 4 mıllıon teńgeden asqan. 

— Alaıaqtar azamattardy túrli qaýipke toly tizbekterge tartý úshin psıhologııalyq qysym men aldaýdy jıi qoldanady. Kúmándi jaǵdaı baıqalǵan kezde birden polıtsııaǵa júginý óte mańyzdy. Bul jaǵdaıda biz jas jigittiń ornalasqan jerin shuǵyl anyqtap, zańsyz áreketterdiń jolyn kestik. Qazir alaıaqtyqqa qatysy bar adamdardy anyqtaý jáne ustaý sharalary júrgizilýip jatyr, — dedi Almaly aýdandyq polıtsııa basqarmasynyń jedel kezekshisi Ádilet Slıambaev. 

Polıtseılerdiń jedel áreketiniń arqasynda otbasynyń jınaǵan qarajatyn saqtap qaldy.

— Biz ulymyzdyń beıtanys adamdarmen hat almasyp, olardyń nusqaýymen aqsha aýdarmaq bolǵanyn baıqadyq. Dereý dabyl qaǵyp, polıtsııaǵa bardyq. Osy jerde bizge kómektesti, balamyzdy jyldam taýyp, alaıaqtyqtyń aldyn aldy. Polıtsııa qyzmetkerlerine kásibıligi men qoldaýy úshin alǵys aıtamyz, — dedi jigittiń ákesi.

Almaty polıtsııasy qala turǵyndaryn qyraǵy bolýǵa, kúmándi ınternettegi tanystarǵa senbeýge shaqyrady. Quzyrly organ alaıaqtyq belgileri baıqalǵan jaǵdaıda ishki ister organdaryna dereý habarlasý keregin eskertti. 

Eske sala keteıik, buǵan deıin Jambyl oblysynda boıjetken TikTok arqyly tanysqan jigitke 1,4 mln teńge qaryzǵa berip, aldanyp qalǵanyn jazǵan edik.