Almaty ózenderindegi jaǵdaıǵa baılanysty TJD basshysy málimdeme jasady
ALMATY. KAZINFORM — Almatydaǵy tótenshe jaǵdaıǵa baılanysty TJD bastyǵy beıneúndeý jasady.
Almaty qalasy TJD bastyǵy Damır Ermaǵambetovtyń aıtýynsha, Aqsaı ózeninde jaǵdaı turaqty. Qazir TJD jedel toby men «Qazseldenqorǵaý» mamandary jaǵdaıdy baqylaýda ustap otyr.
— «Qazseldenqorǵaý» mamandarymen birge Aqsaı ózeninde, ózen aǵysynan shamamen bir shaqyrym joǵary ornalasqan ýchaskede ushqyshsyz ushý apparaty arqyly monıtorıng júrgizip jatyrmyz. Qazirgi ýaqytta ózen arnasy turaqty baqylaýda. Qaýip joq. Aqsaı bógetinde jáne turǵyn úı sektorynda jedel shtabtar jaıylǵan. Abyroı bolǵandaa turǵyndardy evakýatsııalaý qajettiligi týyndaǵan joq, — Damır Ermaǵambetov.
Eske salaıyq, buǵan deıin sel qaýpine baılanysty Almaty qutqarýshylary taýly aımaqqa barmaýǵa shaqyrdy.
