Almaty-Óskemen trassasynda avtobýs pen júk kóligi soqtyǵysyp, júrgizýshi qaza boldy
ASTANA. KAZINFORM — Qazir oqıǵaǵa qatysty sotqa deıingi tergeý bastaldy, dep habarlaıdy Abaı oblystyq PD baspasóz qyzmeti.
2025 jylǵy 23 jeltoqsanda shamamen saǵat 08:20–da Almaty — Óskemen avtojolynyń 681-shaqyrymynda Yutong markaly avtobýs pen KamAZ-5320 júk kóliginiń qatysýymen jol-kólik oqıǵasy tirkeldi.
— Avtobýs júrgizýshisi oqıǵa ornynda qaza tapty. Úsh adam medıtsınalyq mekemege júginip, tekserýden keıin úılerine jiberildi. Atalǵan derek boıynsha jol-kólik oqıǵasynyń barlyq mán-jaıyn jan-jaqty, tolyq jáne obektıvti anyqtaýǵa baǵyttalǵan sotqa deıingi tergeý bastaldy. Qajetti tergeý áreketteri men sot saraptamalary taǵaıyndaldy. Olardyń nátıjeleri boıynsha tıisti protsessýaldyq sheshim qabyldanady. QR Qylmystyq-protsestik kodeksiniń 201-babynyń 1-bóligine sáıkes sotqa deıingi tergeýdiń ózge derekteri jarııa etilmeıdi, — delingen habarlamada.
Abaı oblysy Polıtsııa departamenti júrgizýshilerge eskertý jasady.
— Belgilengen jyldamdyq rejımin jáne qaýipsiz araqashyqtyqty saqtańyz, qarsy baǵytqa shyqpańyz, kólik quralyn tek demalyp alǵan jaǵdaıda ǵana basqaryńyz. Esińizde bolsyn, róldegi árbir áreketińiz aınalańyzdaǵy adamdardyń ómiri men qaýipsizdigine tikeleı áser etedi, — dep túsindirdi vedomstvo.
Budan buryn Batys Qazaqstan oblysyndaǵy jol apatynan 2 adam kóz jumǵany belgili boldy.