Almaty – Óskemen tasjolyndaǵy jol apatynan bir adam qaza taýyp, jeti adam jaraqat aldy
ASTANA. KAZINFORM – Jetisý oblysyndaǵy Almaty – Óskemen avtojolynyń 171-shaqyrymynda eki Toyota Camry kóligi soqtyǵysty. Jol apatynan bir adam qaza taýyp, taǵy jeti adam jaraqat alyp, aýrýhanaǵa jetkizildi.
Polıtsııanyń málimetinshe, atalǵan oqıǵaǵa baılanysty qylmystyq is qozǵaldy.
Aldyn ala málimet boıynsha, Toyota Camry kóliginiń júrgizýshisi rólge ıe bola almaı, aldynda sol baǵytta ketip bara jatqan taǵy bir Toyota Camry kóligine soǵylǵan. Saldarynan kólikterdiń birin basqarǵan 56 jastaǵy er adam oqıǵa ornynda kóz jumdy. Túrli jaraqat alǵan taǵy jeti adam dárigerlerdiń kómegine júginý úshin aýrýhanaǵa jetkizildi.
Qazir oqıǵanyń barlyq mán-jaıyn anyqtaý úshin tergeý júrip jatyr. Osyǵan baılanysty polıtsııa júrgizýshiler men jol qozǵalysyna qatysýshylardy jol erejesin qatań saqtaýǵa shaqyrdy.
– Jol qozǵalysy erejesin árdaıym saqtańyzdar. Jyldamdyqty jol men aýa raıynyń jaǵdaıyna qaraı tańdańyzdar. Kólikter arasyndaǵy araqashyqtyqty saqtap, rólde otyrǵan kezde basqa nársege alańdamańyzdar. Joldaǵy qaýipsizdik árqaısymyzǵa baılanysty ekenin umytpańyzdar, – dedi polıtsııa ókilderi.
Aıta keteıik, buǵan deıin Qazaqstandaǵy jol-kólik oqıǵalarynyń 91 paıyzy júrgizýshilerdiń kinásinen bolatyny habarlanǵan edi.
