Almaty-Óskemen tasjolynda qatty jel júk kóliginiń tirkemesin aýdaryp jibergen

SEMEI. KAZINFORM – Almaty-Óskemen tasjolynyń Abaı oblysynyń aýmaǵyndaǵy ýchaskede qatty soqqan jel júk kóliginiń tirkemesin aýdaryp jiberdi.

Oblystyq polıtsııa departamenti baspasóz qyzmetiniń málimetine súıensek, oqıǵa búgin saǵat 14:30 shamasynda bolǵan. 

— Almaty-Óskemen tasjolynyń 938-shi shaqyrymynda qatty soqqan jeldiń ekpini Mercedes-Benz Atego júk kóliginiń tirkemesin aýdaryp jiberdi. Abyroı bolǵanda, zardap shekken eshkim joq. Sol jerge dereý polıtsııa men shuǵyl qyzmet ókilderi jetti, — delingen aqparatta. 

Osy rette, tártip saqshylary júrgizýshilerge daýyl soqqanda jáne qolaısyz aýa raıy jaǵdaıynda jolda asa saq bolý qajettigin eskertti. 

Eske salsaq, osyǵan deıin Abaı oblysynda balasyna 44 mln teńge alıment tólemegen adam Reseı azamattyǵyn alyp alǵany habarlanǵan.