Almaty – Óskemen tas jolynda 4 kólik soqtyǵysyp, bir adam qaza tapty
ASTANA. KAZINFORM – Almaty – Óskemen tas jolynda tórt kóliktiń qatysýymen jol apaty bolyp, bir adam kóz jumdy, taǵy birneshe adam zardap shekti, dep habarlaıdy Abaı oblysy polıtsııa departamenti.
Polıtsııa málimetinshe, jol apaty 9 shilde kúni saǵat 08:40 shamasynda Jarma aýyly mańyndaǵy tas joldyń 885-shaqyrymynda bolǵan.
Aldyn ala aqparat boıynsha, Volkswagen Polo júrgizýshisi kólik basqarý kezinde alańdap, qarsy baǵyttaǵy jolaqqa shyǵyp ketken. Saldarynan Volvo júk kóligimen soqtyǵysqan. Keıin jol apatyna taǵy eki kólik – Toyota Windom jáne DAF júk kóligi qatysqan.
– Jol-kólik oqıǵasy saldarynan Volkswagen Polo avtokóliginiń jolaýshysy alǵan jaraqattarynan oqıǵa ornynda kóz jumdy. Jol apatynda bolǵan birneshe adam túrli jaraqatpen medıtsınalyq mekemege jetkizildi, – dep habarlady Abaı oblysy polıtsııa departamenti.
Atalǵan derek boıynsha QR Qylmystyq kodeksiniń 345-baby 3-bóligimen sotqa deıingi tergeý bastaldy. Tergeýshiler oqıǵanyń barlyq mán-jaıyn anyqtap jatyr.
Polıtsııa júrgizýshilerge jolda barynsha muqııat bolý qajettigin eskertti.
– Uıaly telefon paıdalaný, habarlama jazý, salonnan zat izdeý jáne júrgizýshini joldan alańdatatyn kez kelgen áreket jol apaty qaýpin aıtarlyqtaı arttyrady. Birneshe sekýndtyq zeıinsizdiktiń ózi kólikti basqarýdy joǵaltýǵa ákelýi múmkin, – dep atap ótti vedomstvodan.
Aıta keteıik, Óskemende kólikpen qarsy jolaqqa shyǵyp vıdeo túsirgen 18 jastaǵy jigit jaýapqa tartyldy.
