Almaty – Óskemen avtojolynyń jańartylǵan 21 shaqyrymynda kólik qozǵalysy ashyldy
ASTANA. KAZINFORM — Respýblıkalyq mańyzy bar Almaty – Óskemen avtojolynyń 213–234-shaqyrymdary aralyǵynda negizgi qurylys-montaj jumystary aıaqtaldy. QazAvtojol 27 qazannan bastap jańartylǵan 21 shaqyrymdyq bóliktiń negizgi júris bóligimen kólik qozǵalysy ashylǵanyn habarlady.
Joba aıasynda joldyń asfaltbeton jamylǵysy ǵana emes, onyń negizi, sý burý qurylystary men qaýipsizdik nysandary da jańartyldy.
Joldyń beriktigin arttyryp, qyzmet etý merzimin uzartý úshin keıbir tustarda 1–1,5 metr tereńdikke deıingi topyraq qabaty alynyp, ornyna jobalyq talaptarǵa saı jańa materıaldar tóseldi. Jańartylǵan 21 shaqyrymnyń ón boıyna úsh qabatty asfaltbeton jamylǵysy salyndy.
Joldy erigen qar men jańbyr sýynan qorǵaýǵa erekshe kóńil bólindi. Jol boıyndaǵy eńister nyǵaıtylyp, tutas betonnan sý aǵatyn aryqtar men naýalar salyndy. Sondaı-aq jerústi sýlaryn burý júıesi jasaldy. Bul sharalar sý shaıyp ketýiniń aldyn alyp, joldyń uzaq ýaqyt paıdalanylýyna múmkindik beredi.
Buǵan qosa, burynnan bar 37 sý ótkizý qubyry jóndelip, kólik aıryqtarynyń kirme jáne shyǵý joldaryna taǵy tórt jańa qubyr ornatyldy. Maldyń joldy qaýipsiz kesip ótýi úshin negizgi joldyń astynan arnaıy ótkel jasaldy. Janýarlardyń kólik júretin bólikke shyǵyp ketýine jol bermeý maqsatynda jol boıyna torly qorshaýlar ornatyldy.
Joba aıasynda Muqry ózeni arqyly ótetin kópir de tolyq jóndeldi. Kópirdiń jol jamylǵysy men deformatsııalyq jikteri aýystyrylyp, qorshaýlary jańartyldy. Tutas betonnan jıektastar ornatylyp, kópirdiń aralyq qurylymdary men tirekteri syrlandy.
Osylaısha 21 shaqyrymdyq bólikte jol jamylǵysy jańartylyp, negizi nyǵaıtyldy jáne ınjenerlik qurylystary jóndeldi. Atqarylǵan jumystar qozǵalys qaýipsizdigin arttyrýǵa, joldyń aýa raıy men sý áserine tózimdiligin kúsheıtýge jáne júrgizýshilerge qolaıly jaǵdaı jasaýǵa baǵyttalǵan.
Qazirgi ýaqytta jol boıyn abattandyrý jáne jabdyqtaý jumystary jalǵasyp jatyr. Bul jumystar kólik qozǵalysyna kedergi keltirmeıdi.
Aıta keteıik, «QazAvtoJol» men qazaqstandyq bankter sındıkaty $700 mln deıingi somaǵa kredıttik kelisimge qol qoıdy.
