«Almaty-Óskemen» avtojoly: Qonaev tusyndaǵy qaýipti burylys jabyldy

QONAEV. KAZINFORM — Qonaev qalasynyń Polıtsııa basqarmasy jazǵy týrıstik maýsymǵa daıyndalý jáne kólik aǵynynyń ulǵaıýyna baılanysty keptelisterdiń paıda bolýyn azaıtý úshin birneshe kóshede jol qozǵalysyn ózgertti.

Qonaev qalasy ákimdiginiń málimetine sáıkes, qala mańyndaǵy «Almaty-Óskemen» avtojolynda kólik quraldarynyń burylýyna baılanysty jol-kólik oqıǵalary jıi bolǵan. Osyǵan baılanysty Qonaev qalasynyń janynan ótetin «Almaty-Óskemen» avtojolynda «Burylýǵa arnalǵan oryn» jol belgileri alynyp, ol jerlerge beton qorshaýlar qoıý týraly sheshim qabyldandy.

— Kólik quraldarynyń júrgizýshilerine túsinistikpen qaraý, jol qozǵalysy erejelerin buzbaý jáne jol belgileriniń nusqamalaryn qatań saqtaýyn suraımyz, — dep habarlady ákimdiktiń baspasóz qyzmeti.

Sondaı-aq, qalanyń birneshe kóshesinde jol qozǵalysy ózgerdi.

Dostyq jáne Muqanov kóshelerinde «bir jaqty qozǵalys» jol belgileri, al Jambyl jáne Muqanov kósheleriniń qıylysynda «kirýge tyıym salynady» jáne «ońǵa burylýǵa tyıym salynady» jol belgileri qoıylady.