Almaty ormandarynda ot jaqqan 100-den astam adam jaýapqa tartyldy

ALMATY. KAZINFORM — Almatyda órttiń joǵary qaýpi bar maýsym aıaqtaldy.

Almaty qalasy TJD memlekettik órt baqylaý basqarma bastyǵynyń orynbasary Erkebulan Jumataev qalanyń tabıǵı aýmaqtaryndaǵy órttiń aldyn alý boıynsha atqarylǵan jumystar týraly aıtty.

Onyń aıtýynsha, naýryz ben qarasha aılarynyń aralyǵynda qala aýmaǵynda órt qaýpi joǵary kezeń boldy. Osy ýaqyt ishinde 21,6 myń gektar orman-saıabaq aýmaǵy erekshe baqylaýǵa alyndy.

Monıtorıng kezeńinde TJD jáne polıtsııa qyzmetkerleri 146 reıd júrgizip, halyqqa 7 myńnan astam jadynama taratqan. Odan bólek 169 ot jaǵý faktisiniń jolyn kesip, 167 adamdy jaýapqa tartty. Barlyǵy 355 gektardan astam qurǵaq dala aýmaǵyn tekserildi.

— Órt qaýipsizdik rejımin buzǵany úshin 2 adam ÁQBtK-niń 505-baby boıynsha jaýapqa tartyldy. 138 quqyqbuzýshy 410-bap boıynsha 4,8 mln teńge kóleminde aıyppul tóledi. Taǵy 16 adam 336-bap boıynsha jaýapqa tartyldy, — dedi ol.

Erkebulan Jumataev halyq kóp demalatyn, týrıster jıi baratyn oryndarda profılaktıkalyq jumystar jalǵasatynyn atap ótti.

— Turǵyndardy abaı bolýǵa shaqyramyz. Kez kelgen uqypsyzdyqtyń arty úlken órtke ulasýy múmkin, — dedi ol.

Eske salaıyq, bıyl Almaty qalasy men Almaty oblysynyń taýly aımaqtarynda birneshe ret órt shyqty.