Almaty óńirinen Pavlodar oblysyna deıin: Qazaqtelekom aýyldarda 14 jańa bazalyq stantsııany iske qosty
ASTANA. KAZINFORM - «Qazaqtelekom» AQ elimizdiń aýyldarynda joǵary jyldamdyqty symsyz ınternet ınfraqurylymyn damytý ústinde. Tamyz aıynda telekommýnıkatsııa operatorynyń enshiles kompanııasy – «Aýyl Telekom» joba aıasynda Qazaqstannyń alty oblysynda birden 14 FWA bazalyq stantsııasyn iske qosty.
Jańa ınfraqurylym 7,2 myńnan astam úı sharýashylyǵy ornalasqan aýmaqtardy qamtıdy.
Jańa bazalyq stantsııalar Almaty, Qyzylorda, Batys Qazaqstan, Aqtóbe, Jetisý jáne Pavlodar oblystarynda iske qosyldy. Nysandardyń eń kóp sany Almaty oblysynda – Tegistik, Qaınar, Aqdala, Birlik, Qaraoı, Baltabaı jáne Dardamty aýyldarynda jeti bazalyq stantsııa jumysyn bastady. Taǵy eki stantsııa Qyzylorda oblysynyń Amangeldi jáne Aqsýat (Aralqum) aýyldarynda, sondaı-aq Batys Qazaqstan oblysynyń Jańa Qazanka jáne Qarasý aýyldarynda iske qosyldy. Aqtóbe oblysynyń Bógetsaı aýylynda, Jetisý oblysynyń Lepsi aýylynda jáne Pavlodar oblysynyń Pogranıchnık aýylynda bir-bir bazalyq stantsııadan paıdalanýǵa berildi.
Kompanııada atap ótkendeı, mundaı ınfraqurylymdy damytý tirkelgen jelilerdi tartý tehnıkalyq turǵydan kúrdeli nemese qomaqty shyǵyndardy talap etetin aýyldardy zamanaýı ınternetke qol jetkizedi.
-Aýyl turǵyny úshin ınternettiń qandaı tehnologııa arqyly kelip jatqanynan góri, baılanystyń arqasynda qandaı múmkindikterge ıe bolǵany mańyzdy. Bul — memlekettik jáne qarjylyq servısterge, bilim alyp, jumys isteýge, tsıfrlyq qyzmetterge jáne kúndelikti onlaın-servısterge qoljetimdilik. Sondyqtan bizdiń mindetimiz — sapaly joǵary jyldamdyqty ınternet asa qajet bolatyn jerlerde ınfraqurylymdy júıeli túrde keńeıtý. Árbir jańa bazalyq stantsııanyń iske qosylýy is júzinde tutas bir eldi mekenniń tsıfrlyq múmkindikterin keńeıtedi, — dedi «Aýyl Telekom» JShS Bas dırektory Ámiráli Seıilov.
Aýyldardy ınternetke qosý úshin FWA (Fixed Wireless Access — tirkelgen symsyz qoljetimdilik) tehnologııasy qoldanylady. Ol abonentke deıingi «sońǵy mılıany» symsyz jeli arqyly uıymdastyrýǵa múmkindik beredi: bazalyq stantsııa aýmaqty qamtýdy qamtamasyz etedi, al paıdalanýshyǵa ár úıge jeke kabel tartýdyń qajeti bolmaıdy. Mundaı tásil úıler bir-birinen edáýir qashyqtyqta ornalasýy múmkin aýyldyq jerler úshin asa ózekti. FWA tehnologııasyn damytý joǵary jyldamdyqty ınternettiń qamtý aýmaǵyn keńeıtip, jańa eldi mekenderdi zamanaýı telekommýnıkatsııalyq ınfraqurylymǵa qosýǵa múmkindik beredi.
-Búginde zamanaýı tsıfrlyq servısterge qoljetimdilik joldar men basqa da bazalyq kommýnıkatsııalar sııaqty kez kelgen eldi meken ınfraqurylymynyń mańyzdy bóligine aınalyp keledi. «Aýyl Telekom» Qazaqstannyń aýyldarynda telekommýnıkatsııalyq ınfraqurylymdy damytý jáne sapaly ınternetpen qamtamasyz etý maqsatynda quryldy. Bul — kompanııamyzdyń negizgi mindetteri men mıssııalarynyń biri. Biz shaǵyn eldi mekenderge erekshe nazar aýdaramyz, óıtkeni dál sol jerlerde zamanaýı baılanysqa qoljetimdilik adamdardyń ómirin aıtarlyqtaı ózgertedi. Árbir jańa qosylym — aýyldyń tsıfrlyq ınfraqurylymyn damytýǵa, zamanaýı servısterdiń qoljetimdiligin arttyrýǵa jáne onyń turǵyndary úshin jańa múmkindikter jasaýǵa qosylǵan úles, — dep atap ótti Kommertsııalyq dırektor Іlııas Aıýpov.
Kompanııa málimetinshe, jańa bazalyq stantsııalardy ornatý aýyldardy sapaly baılanyspen qamtamasyz etý boıynsha júıeli jumystyń bir bóligi bolyp tabylady. Jyl sońyna deıin taǵy 120 eldi mekendi symsyz ınternetke qosý josparlanyp otyr.
