Almaty óńirindegi sel qaýpi bar kólder táýlik boıy baqylaýǵa alyndy
ASTANA. KAZINFORM – Tótenshe jaǵdaılar mınıstrliginiń «Qazseldenqorǵaý» memlekettik mekemesi Almaty qalasy men Almaty oblysyndaǵy taý ózenderi men morenalyq kólderge monıtorıngti kúsheıtti.
2 shildede «Qazseldenqorǵaý» mamandary Almaty qalasy TJD qyzmetkerlerimen birlesip Aqsaı, Qarǵaly, Kishi Almaty jáne Úlken Almaty ózenderi alaptaryndaǵy morenalyq kólderge áýeden vızýaldy baqylaý júrgizdi.
Tekserý nátıjesinde barlyq morenalyq kólderdiń muzdan tolyq arylyp, maýsymdyq tolý kezeńine ótkeni anyqtaldy. Tabıǵı sý aǵymy qalypty deńgeıde saqtalǵan. Sel qaýpi bar kólderdegi sý deńgeıi shekti kórsetkishterden edáýir tómen, al sel belsendiliginiń belgileri tirkelmegen.
«Gıdrologııalyq jaǵdaı turaqty», – dep habarlady TJM.
Sonymen qatar «Qazseldenqorǵaý» mekemesiniń avarııalyq-mehanıkalandyrylǵan brıgadasy Aqsaı ózeni alabyndaǵy apattyq-qalpyna keltirý jumystaryn aıaqtady. Jumys barysynda búlingen jol ýchaskeleri qalpyna keltirilip, ózen jaǵalaýy bekitildi jáne gıdrotehnıkalyq qurylystarǵa qaýipsiz qatynaý qamtamasyz etildi.
Gıdrologııalyq jaǵdaıdy baqylaýdy kúsheıtý maqsatynda Almaty qalasy men Almaty oblysyndaǵy taý ózenderinde qosymsha jyljymaly baqylaý beketteri ornalastyryldy. Morenalyq kólderdiń, muzdyqtardyń jáne ózen arnalarynyń jaı-kúıine táýlik boıy monıtorıng júrgizilýde.
Aıta keteıik, buǵan deıin Almatyda sel qaýpine baılanysty turǵyndar qaýipsiz jerge kóshirile bastady.
