Almaty óńirinde kene shaǵý órship tur — DSM
ASTANA. KAZINFORM — Elimizde kene belsendiligi bıyl ádettegiden erte bastaldy. Densaýlyq saqtaý mınıstrligine qarasty Ulttyq qoǵamdyq densaýlyq saqtaý ortalyǵynyń málimetinshe, keıingi aptada elde kene shaǵýdyń 1515 jaǵdaıy tirkelgen.
Mamandar epıdemıologııalyq maýsymnyń erte bastaýyna kúnniń jylynýy men ylǵaldylyqtyń artýy sebep deıdi.
— Bıyl epıdemıologııalyq maýsym byltyrǵa qaraǵanda 1-2 apta erte, naýryz aıynda bastaldy. Ázirge kene entsefalıti tirkelgen joq. Biraq kene shaqý boıynsha shaǵymdar bar. Qazirge deıin 5 myńnan astam adam medıtsınalyq kómekke júgindi. Onyń 50 paıyzy balalar. Kene shaqqan adamdardyń 97 paıyzy jedel profılaktıkalyq kómek retinde ımmýnoglobýlın aldy, — deıdi QR DSM sanıtarııalyq-epıdemıologııalyq baqylaý komıtetiniń bas sarapshysy Araı Zekenova Jibek joly arnasynyń «Búgin LIVE» baǵdarlamasyna bergen suhbatynda.
Qazirgi ýaqytta kene shaǵý jaǵdaılary ásirese ońtústik-shyǵys óńirlerde jıi tirkelip otyr.
— Qazir kene shaǵý Almaty oblysy men Almaty qalasynda órship tur. Biraq tabıǵı oshaq bolǵandyqtan jáne epıdemııalyq maýsym erte bastalǵan soń bul qalypty dep oılaımyn, — deıdi maman.
Sarapshynyń aıtýynsha, Qazaqstanda kene entsefalıti boıynsha naqty endemııalyq aýmaqtar belgilengen. Bul óńirlerde turǵyndarǵa saqtyq sharalaryn kúsheıtý usynylady.
— Bizde naqty belgilengen endemııalyq aýmaq bar. Onyń ishinde Almaty men onyń mańaıy, Almaty oblysy, Jetisý oblysy, Shyǵys Qazaqstan oblysy bar. Oǵan qosa Abaı oblysy, Soltústik Qazaqstan oblysy men Aqmola oblysynda bir-bir aýdannan bar. Barlyq aımaqtaǵy keneler birdeı aýrý taratpaıdy, — deıdi stýdııa qonaǵy.
Sondaı-aq mamandar bıyl keneniń belsendi kezeńi de erterek sharyqtaýy múmkin ekenin joqqa shyǵarmaıdy. Jer úıde turatyn azamattarǵa aýmaqty arnaıy uıymdar arqyly dáriletý usynylady.
— Epıdemııalogııalyq kezeńniń erte bastalýyna baılanysty sharyqtaý shaǵy de erte keledi dep oılaımyn. Óıtkeni kún jylyp, ylǵaldylyq arta bastaǵanda olar belsendi bola túsedi. Jer úıde turatyn azamattar óz aýlasyn dezınfektsııa boıynsha lıtsenzııasy bar jeke menshik uıymdar arqyly dárileı alady. Oǵan qosa Ulttyq saraptama ortalyǵy da júrgizedi. Al shyǵyn azamattardyń qaltasynan óteledi, — dep túıindedi sarapshy.
Eske sala keteıik, kene arqyly taralatyn aýrý kúsheıip keledi.
