Almaty óńirlik garnızonynyń áskerı qyzmetshileri ardager desantshyny quttyqtady
ASTANA. KAZINFORM – Almatyda Desanttyq-shabýyldaý áskerleriniń áskerı qyzmetshileri Ekinshi dúnıejúzilik soǵystyń ardageri Vıktor Karpovıch Izıýmnıkovty quttyqtady.
Qorǵanys vedomstvosynyń ókilderi maıdangerdiń úıine áskerı orkestrmen baryp, Vıktor Karpovıchtiń súıikti áýenderin oryndady. Kórshileri men áskerı qyzmetshiler Uly Jeńis jolynda erlik kórsetken ardagerge alǵystaryn jaýdyryp, qoshemet kórsetti. Qarııaǵa Qorǵanys mınıstriniń Alǵys bildirgen quttyqtaý haty tabystaldy.
Vıktor Karpovıch Vengrııa men Avstrııa jerlerinde shaıqasyp, Vena qalasyn shabýyldaýǵa jáne Chehoslovakııa shekarasyndaǵy Znoımo qalasyn azat etýge qatysqan. Jeńis kúnin sol jerde qarsy alǵan. Onyń janqııarlyq erligi II dárejeli Otan soǵysy ordenimen, «Jaýyngerlik eńbegi úshin» medalimen jáne basqa da marapattarmen baǵalanǵan.
Ardagerdi quttyqtaýǵa Armııa ortalyq sport klýbynyń ókili, bokstan álem chempıony Angelına Lýkas ta qatysty. Ol Vıktor Karpovıchke beıbit ómir syılaǵany úshin alǵys aıtyp, zor densaýlyq, uzaq ǵumyr jáne jan jylýyn tiledi.
– Vıktor Karpovıch – ańyz adam, jeńimpaz urpaqtyń ókili. Búgingi beıbit ómirimiz osy kisilerdiń erliginiń arqasy. Desanttyq-shabýyldaý áskerleriniń áskerı qyzmetshileri úshin onyń ómir joly – Otanǵa adal qyzmet etýdiń jáne halqyna degen shynaıy berilgendiktiń úlgisi, – dedi Desanttyq-shabýyldaý áskerleri qolbasshysynyń tárbıe jáne ıdeologııalyq jumystar jónindegi orynbasary polkovnık Radjan Janysov.
Óz kezeginde ardager kórsetilgen qurmet pen qamqorlyq úshin alǵysyn bildirip, búgingi tańda eń mańyzdysy – jeńimpaz urpaqtyń erligin umytpaı, jastardy patrıottyq rýhta, tarıhty qurmetteýge jáne Otandy súıýge tárbıeleý ekenin aıtty.
Osyndaı kezdesýler – ardagerlerge kórsetilgen qurmet qana emes, urpaqtar sabaqtastyǵynyń aıqyn kórinisi ári Jeńistiń qandaı aýyr baǵamen kelgenin eske salatyn mańyzdy taǵylym.
Aıta ketelik Shahtınskide turǵyndardy qutqaryp qalǵan bes polıtseı marapattalǵan edi.
