Almaty onkoortalyǵynda robottandyrylǵan dárihana iske qosyldy
ASTANA. KAZINFORM – Almaty onkologııalyq ortalyǵynda dárilik preparattardy qabyldaý, saqtaý, daıyndaý jáne naýqasqa berý úderisin avtomattandyratyn robottandyrylǵan dárihana kesheni iske qosyldy, dep habarlaıdy qala ákimdigi.
Ortalyqta sonymen qatar dárilik preparattardy jabyq ári germetıkalyq jaǵdaıda daıyndaýǵa arnalǵan arnaıy júıe engizildi.
Jańa tehnologııa dári-dármekpen jumys isteýdiń negizgi kezeńderin avtomattandyrýǵa múmkindik beredi. Árbir preparatqa jeke kod berilip, onymen jasalǵan barlyq áreket tsıfrlyq júıede tirkeledi.
– Júıe dárilik preparattyń ortalyqqa túsken sátinen bastap naýqasqa berilgenge deıingi búkil qozǵalysyn baqylaýǵa múmkindik beredi. Negizgi úderisterdi avtomattandyrý adamı faktordyń yqpalyn azaıtyp, dári-dármekti esepke alý men paıdalanýdyń dáldigin arttyrady, – delingen habarlamada.
Qazirgi ýaqytta Almaty onkologııalyq ortalyǵynda 38 myńnan astam naýqas esepte tur. Jyl saıyn munda 27 myńnan astam adam medıtsınalyq kómek alady.
Sońǵy segiz jyl ishinde ortalyqta kórsetiletin emdeý qyzmetteriniń kólemi 2,5 ese artqan.
Sonymen qatar onkologııalyq aýrýǵa shaldyqqan naýqastardyń bes jyldyq ómir súrý kórsetkishi 46%-dan 75%-ǵa deıin ósken.
Aıta keteıik, Astanadaǵy eki dárihanaǵa vırýsqa qarsy dárilerdiń jańa partııasy ákelinedi.
