Almaty onkologııalyq ortalyǵy elde alǵash bolyp jańa býynnyń pozıtsııalaý júıesin engizdi
ASTANA. KAZINFORM — Almaty onkologııalyq ortalyǵynda Qazaqstanda alǵash ret ExacTrac Dynamic Brainlab jańa býynnyń pozıtsııalaý júıesi engizildi. Bul júıe sáýlelik terapııanyń dáldigin arttyryp, onkologııamen aýyratyn patsıentterdi emdeý múmkindikterin keńeıtedi.
Almaty ákimdigi baspasóz qyzmetiniń habarlaýynsha, jańa júıe ártúrli ornalasqan isikterdi, sonyń ishinde bas mıyndaǵy isikter men kóptegen metastazdardy emdeýde qoldanylady.
Emdeý seansy barysynda ol patsıenttiń dene qalpyn, tipti tynys alýǵa baılanysty kishigirim qozǵalysty da úzdiksiz baqylap otyrady. Qarapaıym tynys alý kezinde patsıenttiń qalpy ózgerse, júıe sáýlelendirýdi avtomatty túrde toqtatady. Bul joǵary sáýle dozasyn isikke barynsha dál baǵyttaýǵa, al aınalasyndaǵy saý aǵzalar men tinderdi qorǵaýǵa múmkindik beredi. Sonyń nátıjesinde emniń tıimdiligi artyp, patsıentterdiń ómir súrý sapasyn saqtaýǵa yqpal etedi.
Almaty onkologııalyq ortalyǵynda kún saıyn shamamen 100 almatylyq sáýlelik terapııa kýrsynan ótedi.
Almaty onkologııalyq ortalyǵynyń sáýlelik terapııa bólimshesiniń meńgerýshisi Evgenıı Ishkınınniń aıtýynsha, jańa júıeni engizý joǵary tehnologııalyq onkologııalyq kómekti damytýdaǵy mańyzdy qadam boldy.
— Bul júıe rentgendik, optıkalyq jáne termaldy 3D-vızýalızatsııany paıdalana otyryp, patsıenttiń dene qalpyn alty koordınat boıynsha úzdiksiz baqylaıdy. Tipti, tynys alýǵa baılanysty azdaǵan qozǵalystyń ózi emniń dáldigine áser etýi múmkin. Sondyqtan qandaı da bir aýytqý anyqtalǵan jaǵdaıda sáýlelendirý avtomatty túrde toqtatylady. Bul joǵary sáýle dozasyn isikke barynsha dál jetkizýge, saý tinderge túsetin sáýlelik júktemeni azaıtýǵa jáne emniń tıimdiligin arttyrýǵa múmkindik beredi, — dedi Evgenıı Ishkının.
Eske salaıyq, buǵan deıin Qazaqstanda 15 myńǵa jýyq onkologııalyq naýqas sáýlelik em qabyldap jatqanyn habarlaǵanbyz.
