Almaty oqýshylary úshin jazǵy demalys qalaı uıymdastyrylady

ALMATY. KAZINFORM - Almatyda bıyl jazǵy demalys kezinde 266 myń bala demalady. Mektep janyndaǵy lagerler 27 mamyrda jumys isteı bastaıdy. 

Almaty ákimdiginiń málimetinshe, bıyl balalar úshin saýyqtyrý jáne jumyspen qamtý syndy eki baǵyt boıynsha demalys uıymdastyryldy. Saýyqtyrý demalysy aıasynda jetim, erekshe bilim berý qajettiligi bar, ata-anasynyń qamqorlyǵynsyz qalǵan balalar, sondaı-aq az qamtylǵan jáne kópbalaly otbasylardan shyqqan balalardy 100% qamtý josparda tur. 

«Oqýshylar saraıynyń «Órnek» lagerinde 3 maýsymda 900 bala demalady. Bul «Januıa» balalar úıiniń tárbıelenýshileri, halyqtyń áleýmettik osal toptarynyń balalary, sondaı-aq baıqaýlar men jarystardyń jeńimpazdary. Jumyspen 263 myń oqýshy qamtylady. Osy baǵyt aıasynda oblys pen respýblıka boıynsha týrıstik saparlar, kóshpeli sporttyq jıyndar, 3 kúndik sapar, ekskýrsııalar, pikirsaıys lagerleri, tildik jazǵy mektepter jáne taǵy basqasy uıymdastyrylady», - dep habarlady ákimdikten.

17 kolledj bazasynda alǵash ret 8 synyp oqýshylaryna arnalǵan «Jaz – bolashaq mamandyqpen» jobasy júzege asady. 200-den astam oqýshyǵa jazǵy demalysty qyzyqty ári tıimdi ótkizýge múmkindik beriledi.

«№57 jáne 171 mektepterde etno-lagerler jumys isteıdi. Mektep aýmaǵynda kıiz úıler ornatylady. Baǵdarlama aıasynda ulttyq salt-dástúrlerdi, qundylyqtar men mádenıetti, ádet-ǵuryptardy, qolóner, kórpe tigý, toqý daǵdysy úıretiledi. Sondaı-aq osy jazda 16 sport lageri ashylady, onda zııatkerlik jáne shyǵarmashylyq oıyndar, sporttyq-shyǵarmashylyq baıqaýlar, vıktorınalar jáne taǵy basqasy uıymdastyrylady», - dep atap ótti ákimdikten.

Sonymen qatar 3 maýsymnan bastap Alataý jáne Naýryzbaı aýdandaryndaǵy oqýshylardyń ınnovatsııalyq shyǵarmashylyq ortalyqtarynda «Balalar men kıno», «Balalar men teatr», «Stem-lager» biregeı jobalary iske asyrylady. 

«Jalpy bıyl 150 mektepte ystyq tamaqpen qamtamasyz etilgen mektep janyndaǵy lagerler jumys isteıdi. Bul lagerlerde 40 myńnan astam bala demalady. Al 96 myń bala tamaqtanýsyz mektep janyndaǵy lagerlermen qamtylady. Mektep janyndaǵy lagerge balany ornalastyrý máselesi boıynsha mekteptiń áleýmettik pedagogyna qabyldaý týraly ótinishpen júginý qajet», - dep túsindirdi ákimdikten.

Buǵan qosa, jaz boıy Oqýshylar saraıy, Oqýshylar úıleri jáne ınnovatsııalyq shyǵarmashylyq ortalyqtary syndy memlekettik qosymsha bilim berý uıymdarynda úıirmeler men sektsııalar tegin jumys isteıdi. Atap aıtsaq, sheshendik óner, akterlik sheberlik, jýrnalıstıka, dombyra, vokal, fortepıano, horeografııa, qysh óneri, toǵyzqumalaq, boks, dzıýdo, zamanaýı baý-baqsha, Lego robototehnıkasy, 3D modeldeý, AR/VR, avıamodeldeý, baǵdarlamalaý. 

Tegin úıirmeler barlyq sanattaǵy balalarǵa arnalǵan.