Almaty — oqyrmandar qalasy: 2,8 mln almatylyq qala kitaphanalaryna barady
ALMATY. KAZINFORM — Almaty Kitaphanalarynyń 97% tolyq jańǵyrtylǵan. 2025 jyldyń jalpy kitap qory 1 372 423 dana, onyń 432 257-i qazaq tilinde, 911 125-i orys tilinde jáne 27 656-y shet tilinde.
Kitaphanalardyń qoǵamdyq mańyzy kúnnen-kúnge artyp keledi: 2025 jyly 11 aıdaǵy derekke sáıkes, 2,8 mıllıonnan astam turǵyn kitaphanalarǵa oqý, bilim alý jáne qarym-qatynas alańy retinde barady.
Búgingi tańda Almaty qalasynda 37 kitaphana jumys isteıdi, olardyń 28-i — Almaty Kitaphanalarynyń bólimsheleri, al 9-y — respýblıkalyq kitaphana. Sonymen qatar árbir joǵary oqý ornynda kitaphana bar.
Qala boıynsha úsh kitaphana táýlik boıy (24/7 rejıminde) jumys isteıdi: Alatau Creative Hub ortalyǵy, Muhtar Áýezov atyndaǵy kitaphana jáne Jambyl atyndaǵy qalalyq jasóspirimder kitaphanasy.
«Qadamdyq qoljetimdi kitaphana» qaǵıdaty aıasynda 26 avtonomdy ózine-ózi qyzmet kórsetý stantsııasy ornatylǵan. Olar saýda ortalyǵy, kovorkıng ortalyǵy men metro beketi syndy halyq kóp júretin jerlerde ornalasqan. Aı saıyn bul stantsııalar shamamen 300 jańa oqyrmandy tirkeıdi jáne 420-ǵa deıin kitap beredi. Bıyl jyl sońyna deıin qosymsha 6 stantsııa ornatý josparlanǵan.
Kitaphana resýrsyn barlyq turǵynǵa qoljetimdi jasaý úshin almatylyq múmkindigi shekteýli jandarǵa arnalǵan tegin úıge kitap jetkizý qyzmeti jumys isteıdi. Bul Almaty qalasy ákimdigimen jáne Yandex Qazaqstan kompanııasymen birlesip qolǵa alynǵan.
Sondaı-aq, A. P. Chehov atyndaǵy ortalyq qalalyq kitaphana, Jambyl atyndaǵy qalalyq jasóspirimder kitaphanasy, Qazaqstandyq Jazýshylar kitaphanasy, Alatau Creative Hub ortalyǵy, Muhtar Áýezov atyndaǵy kitaphana syndy jeti kitaphana bólimshesinde, sondaı-aq № 14 jáne № 45 kitaphana bólimshesinde kózi nashar kóretin jáne zaǵıp oqyrmandarǵa arnalǵan arnaıy Braıl baǵdarlamalarymen jáne dybystyq ınterfeıstermen jabdyqtalǵan arnaıy bólimder bar.
Tsıfrlandyrý salasynda aýyz toltyryp aıtar jetistik bar. www.almatylibrary.kz resmı saıty iske qosylǵan. Paıdalanýshylarǵa elektrondy oqý zalyna, kitaphanalardyń vırtýaldy 3D-týryna, onlaın oqyrman bıletin rásimdeýge jáne kitap jetkizý qyzmetine qol jetkizý múmkindigi usynylǵan. Qazirgi ýaqytta portalǵa 30 451 basylym engizilgen, onyń 13 127-i osy jyly qosyldy, bul jalpy qordyń 61%-y (49 492 ataý). Qordy tolyq elektrondy formatqa kóshirý jumystary jalǵasyp jatyr.
Sonymen qatar № 6 kitaphana-bólimshesiniń bazasynda sırek jáne qundy basylymdardy qalpyna keltirý jáne saqtaý jumystaryn júrgizetin restavratsııa zerthanasy bar. Qazirgi tańda 300-den astam kitap qalpyna keltirildi, onyń 32-si sırek kezdesetin basylymdar sanatyna jatady.
Búginde Almaty Kitaphanalary zamanaýı ınfraqurylymymen, ınklıýzıvti jáne tsıfrlyq sheshimderimen qala turǵyndarynyń mádenı jáne bilim berý ómiriniń ajyramas bóligine aınaldy. Jańǵyrtylǵan keńistik, qoljetimdi qyzmet men ınnovatsııalyq format arqyly kitaphanalar tek kitap oqý orny ǵana emes, shyǵarmashylyq pen ózara baılanys ortalyǵyna aınalyp otyr.