Almaty oblystyq sotyna jańa tóraǵa taǵaıyndaldy
ASTANA. KAZINFORM – QR Prezıdentiniń Jarlyǵymen Narıman Beknazarov Almaty oblystyq sotynyń tóraǵasy bolyp taǵaıyndaldy, dep habarlaıdy Joǵarǵy Sottyń baspasóz qyzmeti.
Jańa tóraǵany oblystyń sýdıalar korpýsyna Joǵarǵy Sottyń ákimshilik ister jónindegi sot alqasynyń tóraǵasy Aslan Túkıev tanystyrdy. Saltanatty rásimge Almaty oblysynyń ákimi Marat Sultanǵazıev, sýdıalar, quqyq qorǵaý jáne memlekettik organdardyń ókilderi, sondaı-aq sot qyzmetkerleri qatysty.
Aslan Túkıev Joǵarǵy Sot tóraǵasynyń atynan Narıman Beknazarovty jańa qyzmetimen quttyqtap, onyń sot júıesindegi, sonyń ishinde Almaty qalalyq sotynyń azamattyq ister jónindegi sot alqasynyń tóraǵasy retindegi kópjyldyq tájirıbesine toqtaldy.
– Narıman Beknazarovtyń kúrdeli azamattyq-quqyqtyq jáne ekonomıkalyq daýlardy qaraýda jınaqtaǵan tájirıbesi Almaty oblysynda suranysqa ıe bolady. Qazirgi jaǵdaıda sot praktıkasynyń turaqtylyǵyn qamtamasyz etý, ınvestorlardyń quqyqtaryn senimdi sot arqyly qorǵaý jáne kásipkerlikti damytý úshin qolaıly quqyqtyq orta qalyptastyrý erekshe mańyzdy, – dedi Aslan Túkıev.
Ol bul mindetterdiń zań ústemdigin, sýdıalardyń táýelsizdigin jáne sot sheshimderiniń ádildigin saqtaı otyryp júzege asyrylýy tıis ekenin atap ótti.
– Óńirdiń sýdıalar korpýsy azamattardyń quqyqtary men zańdy múddelerin tıimdi qorǵaý, sot tóreligin sapaly júzege asyrý arqyly oblystyń ınvestıtsııalyq tartymdylyǵyn nyǵaıtyp, sot bıliginiń bedelin arttyrý baǵytyndaǵy jumysty jalǵastyrady dep senemin, – dedi ol.
Resmı bólimnen keıin Aslan Túkıev Almaty oblystyq sotynyń jańa ǵımaratynyń qurylys alańyna baryp, qurylys jumystarynyń barysymen tanysty.
Narıman Beknazarov 1982 jyly Jambyl oblysynyń Taraz qalasynda dúnıege kelgen. 2004 jyly ál-Farabı atyndaǵy Qazaq ulttyq ýnıversıtetiniń zań fakýltetin, 2006 jyly QR Prezıdenti janyndaǵy Memlekettik basqarý akademııasynyń magıstratýrasyn támamdaǵan.
Eńbek jolyn sot jáne prokýratýra organdarynda bastap, ár jyldary Astana qalasynyń mamandandyrylǵan aýdanaralyq ekonomıkalyq sotynyń sýdıasy, mamandandyrylǵan aýdanaralyq tergeý sotynyń tóraǵasy qyzmetterin atqarǵan. 2020 jyldan beri Almaty qalalyq sotynyń azamattyq ister jónindegi sot alqasynyń tóraǵasy boldy.
Aıta keteıik, Álibek Ahmetov Aqtóbe oblystyq sotynyń tóraǵasy laýazymyna taǵaıyndaldy.
