Almaty oblysynyń joldarynda lazerlik júıeler engizildi
QONAEV.KAZINFORM – Jol qozǵalysy qaýipsizdigin qamtamasyz etý jáne jol-kólik oqıǵalarynyń sanyn azaıtý úshin Almaty oblysynyń respýblıkalyq mańyzy bar avtojoldarynda jańa tehnıkalyq sheshimder engizildi.
Oblystyq polıtsııa departamentiniń málimetinshe, qoldanystaǵy arkalyq konstrýktsııalarǵa lazerlik júıeler ornatyldy. Búgingi kúni atalǵan tehnologııalar «Almaty – Óskemen» avtojolynyń 52-shaqyrymynda, sondaı-aq «Almaty – Shelek – Qorǵas» avtojolynyń 38 jáne 204-shaqyrymdarynda jumys istep tur.
Lazerlik qondyrǵylar qaýipsizdikti qamtamasyz etýdiń qosymsha quraly bolmaq. Ásirese túngi ýaqytta jáne qolaısyz aýa raıy jaǵdaılarynda lazer sáýleleri júrgizýshilerge baǵyt-baǵdar beredi.
Eske salaıyq, Almatynyń jaıaý júrginshiler ótkelinde zamanaýı jaryqtandyrý engizildi.
