Almaty oblysynyń ekonomıkasy 6 trln teńgege deıin ósti

QONAEV. KAZINFORM — Almaty oblysy ekonomıkasynyń negizgi baǵyttar boıynsha turaqty ósimi baıqalady. Jalpy óńirlik ónim kólemi úsh jylda 3,4 trln teńgeden 6 trln teńgege deıin ósip, respýblıka boıynsha 10-orynnan 5-orynǵa kóterildi. Bul týraly oblys ákimi Marat Sultanǵazıev aıtty.

2024 jyldyń qorytyndysy boıynsha oblystyń respýblıkadaǵy jalpy ishki ónimdegi úlesi 4,4%-ǵa jetse, bıylǵy birinshi jartyjyldyqta 4,8%-ǵa jetken.

– Іri ónerkásiptik oblystardan ozyp, shıkizattyq emes ekonomıkaǵa negizdelgen ósýdiń draıverine aınaldyq. Osy jyldyń 10 aıynyń qorytyndysy boıynsha qysqa merzimdi ekonomıkalyq ındıkator 109,7% boldy. Barlyq negizgi salalarda oń úrdis jalǵasyp jatyr, – dedi spıker.

Ásirese ónerkásip salasy aıryqsha ósim kórsetip, óndiris kólemi 108,7%-ǵa artyp, 2,1 trln teńgege jetken. Jalpy ónerkásip óndirisiniń 90 paıyzy óńdeý sektorynyń úlesine tıesili.

– Osylaısha agrarlyq baǵytpen ǵana shektelmeı, ınnovatsııalyq tehnologııalar men óńdeý óndirisin damytatyn jetekshi óńirge aınalyp otyrmyz. Óńirlik ónimniń 3/1 bóligi ónerkásip salasyna tıesili. Bul sala – ınvestıtsııa tartýdyń negizgi kózi, — deıdi oblys ákimi.

Aıta keteıik, Almaty oblysynda quny 289 mlrd teńge bolatyn metallýrgııalyq zaýyt salynyp jatyr.